Sahibkarlıq

Ana səhifə

Sahibkarlıq

Vergi Apelyasiya Şurası daha bir sahibkarın şikayətini araşdırıb

27 dekabr 2011 11:21 (UTC +04:00)

Bakı. Əli Əhmədov – APA-Economics. Azərbaycan Vergilər Nazirliyinin nəzdindəki Vergi Apelyasiya Şurası Bakı şəhərindəki gözəllik salonlarından birinin sahibinin şikayətini araşdırıb. Nazirliyin məlumatına görə, Bakı şəhəri Vergilər Departamentində qeydiyyatda olan fərdi sahibkar Əliyeva İradə Calal qızının şikayəti salonda aparılan operativ vergi nəzarəti tədbirləri və onun nəticələrinə aid olub.

«APA-Economics»in məlumatına görə, şikayətdə bildirilir ki, 2011-ci il 24 iyun tarixdə özlərini təqdim etməyən iki nəfər şəxs Bakı şəhəri, Binəqədi rayonu, Naxçıvani küçəsi,24 ünvanında yerləşən gözəllik salonuna daxil olaraq, heç bir sənəd təqdim etmədən nəzarət-kassa aparatından (NKA) kassa çekini götürərək salonu tərk ediblər. Həmin şəxslər salondan kənarda kassa çekinin müştəriyə təqdim olunmamasının səbəbini soruşub və buna görə vergi ödəyicisinə 400 manat məbləğində cərimə tətbiq olunacağını bildiriblər. Sonradan vergi orqanı tərəfindən cərimə olunduğu barədə bildiriş alan İ.Əliyeva avqustun 16-da 195 Telefon Məlumat Xidmətinə zəng vuraraq hadisəni olduğu kimi danışıb və bununla əlaqədar olaraq Vergilər Nazirliyinə dəvət edilərək ondan izahat alınıb.

Məsələnin Vergi Apelyasiya Şurasında araşdırılması zamanı məlum olub ki, fərdi sahibkar İ.Əliyevanın vergi orqanına təqdim etdiyi bəyannamələrdə 2010-cu il üzrə 3024 manat, 2011-ci il üzrə isə 2551 manat gəlir əldə edildiyi göstərilir və bu gəlirlərə görə müvafiq olaraq 120,96 manat və 102,04 manat vergi hesablanıb. Vergi Auditi Departamenti tərəfindən aparılmış araşdırmalara əsasən, bu göstəricilər vergi ödəyicisinin fəaliyyət göstərdiyi ərazi və fəaliyyət növü nəzərə alınmaqla sözügedən obyektdə vergidən yayınma riskinin olduğunu göstərir.

Departamentin «Operativ vergi nəzarətinin həyata keçirilməsi haqqında» qərarına əsasən, vergi əməkdaşları tərəfindən Bakı şəhəri, Binəqədi rayonu, Əcəmi Naxçıvani küçəsi ərazisində, o cümlədən şikayətçinin obyektində də nağd pul hesablaşmalarının aparılması qaydalarına riayət olunması üzrə operativ vergi nəzarəti tədbirləri keçirilib. İ.Əliyevaya məxsus obyektdə operativ vergi nəzarəti həyata keçirilərkən yol verilmiş qanun pozuntusuna görə vergi ödəyicisinə Vergi Məcəlləsinin 58.7-ci maddəsinə əsasən 400 manat məbləğində maliyyə sanksiyası tətbiq edilib. İ.Əliyeva tərtib olunmuş aktı imzalamaqdan və onun nüsxəsini götürməkdən imtina edib, tələb olunsa da, nəzarət kitabçasını təqdim etməyib. Bu səbəbdən də yoxlama aktının bir nüsxəsi sifarişli poçtla vergi ödəyicisinə göndərilib.

Şikayətçinin iştirakı ilə keçirilən müzakirələr bir daha təsdiq edib ki, İ.Əliyevaya məxsus obyektdə operativ vergi nəzarəti tədbirlərinin həyata keçirilməsi və nəticələr barədə sənədlərin tərtibində heç bir qanun pozuntusuna yol verilməyib. Qeyd olunanları nəzərə alaraq, Vergi Apelyasiya Şurası vergi ödəyicisinin şikayətini təmin etməyib və onunla bağlı vergi orqanlarının əvvəlki qərarlarını qüvvədə saxlayıb.