Sahibkarlıq

Ana səhifə

Sahibkarlıq

Ötən il Azərbaycanda 31 min vergi ödəyicisində pozuntu halları aşkarlanıb

10 yanvar 2012 08:02 (UTC +04:00)

Bakı. Əli Əhmədov – APA-Economics. Ötən il ərzində Azərbaycanda vergi orqanları tərəfindən keçirilmiş tədbirlər zamanı 31 053 vergi ödəyicisində qanunvericiliyin pozulması faktları aşkar edilərək müvafiq tədbirlər görülüb.

Vergilər Nazirliyindən «APA-Economics»ə verilən məlumata görə, nəzarət tədbirləri əhali ilə nağd pul hesablaşmalarının aparılması qaydalarına riayət olunması, nəzarət-kassa aparatlarından istifadə, vergi orqanlarında uçota durmadan fəaliyyət göstərən ödəyicilərin aşkar edilməsi, valyuta sərvətlərinin ödəniş vasitəsi olaraq qəbul edilməsi və s. kimi məsələləri əhatə edib.

Operativ nəzarət tədbirləri zamanı 18 554 vergi ödəyicisi tərəfindən nağd hesablaşmaların aparılması qaydalarının pozulması, 2 760 vergi ödəyicisi tərəfindən qanunla nəzərdə tutulmayan valyutanın ödəniş vasitəsi kimi qəbul edilməsi və valyutanın ticarət, iaşə və xidmət müəssisələrində qanunvericiliklə müəyyən edilmiş qaydalar pozulmaqla alınıb-satılması və ya dəyişdirilməsi faktları aşkarlanıb. Keçirilən tədbirlər zamanı vergi orqanlarında uçota durmadan fəaliyyət göstərən 3 316 vergi ödəyicisi aşkar olunub, 4 910 vergi ödəyicisinin xüsusi razılıq (lisenziya) tələb olunan fəaliyyət növləri ilə belə razılıq (lisenziya) almadan məşğul olması faktları müəyyən edilib.

Vergi orqanlarının həyata keçirdiyi operativ nəzarət tədbirləri zamanı 2 807 vergi ödəyicisi tərəfindən 5 207 nəfər fiziki şəxsin əmək müqaviləsi bağlamadan işə cəlb edilməsi, 1 375 vergi ödəyicisi tərəfindən fərqlənmə nişanı olmadan avtomobil nəqliyyatı ilə sərnişin daşınması faktları aşkar olunub. Aksiz markalarının tətbiqi vəziyyətinə nəzarət məqsədilə keçirilən tədbirlər zamanı 643 vergi ödəyicisində aksiz markaları ilə müvafiq qaydada markalanmamış 9 739 ədəd mal aşkar edilib.

Operativ nəzarət tədbirləri zamanı aşkar olunmuş qanun pozuntuları ilə əlaqədar 15,548 mln. manat məbləğində maliyyə sanksiyası və inzibati cərimə tətbiq edilib.