Sahibkarlıq

Ana səhifə

Sahibkarlıq

® Məktəblilər “Jalə”nin qonağı oldular

10 yanvar 2012 13:31 (UTC +04:00)

Bakı - APA-Economics. Azərbaycan flora və faunasına görə dünyanın ən zəngin guşələrindən biri kimi tanınır. Ana təbiət bu məkandan heç bir gözəlliyini əsirgəməyib.

Dövlət müstəqilliyinin bərpasından ötən 20 il ərzində Azərbaycanın təbiətini, flora və faunasını qorumaq, mühafizə etmək, qiymətləndirmək sahəsində də xeyli işlər görülüb. Doğma yurdumuzun ayrı-ayrı guşələri özünəməxsus spesifik xüsusiyyətləri nəzərə alınmaqla cənnətə çevrilməkdədir. Belə bölgələrimizdən biri də Qəbələ rayonudur. Son illər buradakı abadlıq işləri, yeni-yeni istehsal sahələrinin fəaliyyəti nəzər-diqqəti cəlb edir.

Bu günlərdə Sumqayıt şəhərindəki “Təfəkkür” liseyinin şagirdləri Qəbələ konserv zavoduna ekskursiya etdilər. Artıq beş ildir ki, bu müəssisə fəaliyyət göstərir. “Gilan Holdinq”in təşəbbüsü ilə məktəblilərin səyahəti də baş tutub. Bakıdan Qəbələyə qədər uzanan yol uşaqlar üçün çox maraqlı oldu. “Gilan Holdinq - Jalə”nin ictimaiyyətlə əlaqələr şöbəsinin rəhbəri Tamilla Abdullayeva şagirdləri zavodun yaranma tarixi ilə tanış etdi. Qəbələ konserv zavodu 2005-ci ildən tikilməyə başlayıb və 2007-ci ilin mayın 2-dən fəaliyyətdədir. Zavod 12 ha-dan çox ərazini əhatə edir. Burada buraxılan “Jalə” şirələri qısa bir müddətdə Azərbaycan bazarında özünə yer tapa bilib. Zavodun bütün avadanlıqları İtaliya və İsveçrədə hazırlanıb. Burada azərbaycanlılarla yanaşı, Türkiyə və Rusiyadan gəlmiş mütəxəssislər də çalışırlar. Müəssisədə istehsal olunan təbii şirələr müxtəlif mürəbbə və cemlər, marinadlar, pürelər dünyanın 30 dövlətinə satılır. Rusiyadan, Ukraynadan, Belarusdan, Amerikadan, Qərbi Avropa ölkələrindən sifarişlər qəbul olunur. T.Abdullayeva onu da qeyd etdi ki, məhsulun daha keyfiyyətli olması üçün meyvə və tərəvəz yerli fermerlərdən alınır. Ölkəmizin digər bölgələri ilə də bu sahədə sıx əlaqə saxlanılır. Bu, həm də minlərlə insanın işlə təmin olunmasına da şərait yaradır. Azərbaycanın nemətlərini ,bu nemətlərdən alınan məhsulları dünya bazarında layiqincə nümayiş etdirmək Qəbələ konserv zavodunun əsas məqsədidir.

Şagirdlər bu məlumatları maraqla dinlədilər və konserv zavodunu gəzərək deyilənləri bir daha öz gözləri ilə gördülər. Konserv zavodunun kollektivi məktəbliləri səmimi qarşıladı, onlara müxtəlif meyvələrdən təbii şirələrin və digər məhsulların alınması prosesini mərhələlərlə əyani olaraq göstərdilər. Yeddi istehsal xətti ilə tanış olan uşaqlar şirələrin şüşə və Tetra Pak qablarda doldurulması əməliyyatını çox maraqla izlədilər. Meyvələrin qəbulu, yuyulması, təmizlənməsi, doğranılması, nəhəng sisternlərdə qarışdırılıb təbii şirəyə çevrilməsi, nəhayət, sonda ekoloji təmiz, müasir dizaynın tələblərinə cavab verə bilən formada qablaşdırılmış məhsulun alınması prosesini də izləyən şagirdlər bu ekskursiyadan məmnun qaldılar. Nəhəng meyvə soyuducusu ilə tanış olarkən uşaqlar bir daha doğma yurdumuzun necə nemətlər yetişdirdiyinin şahidi oldular. Buradakı meyvələrin ətri, xüsusilə də heyvanın ətri yəqin ki, onların yadında uzun müddət qalacaq. Zavodda fəaliyyət göstərən kağız və karton sexi hazır məhsulların yüksək keyfiyyətdə qablaşdırılmasına imkan verir. Eyni zamanda məhsulun keyfiyyətini yoxlamaq üçün müəssisədə həm də laboratoriya var. Məhsulun qəbulundan ta qablaşdırılmaya qədər olan proseslərin yeni, müasir texnologiyaya cavab verən avadanlıqlarla aparılması, hər yerdə səliqə-sahmanın hökm sürməsi, müəssisədə işgüzar ab-havanın hiss olunmasının nəticəsidir ki, Qəbələ konserv zavodunun məhsulları geniş şöhrət tapa bilib. “Jalə”, “Bağdan”, ”Aycan”, ”Zolotoy sad”, “Natura” təbii şirələri bu zavodun məhsullarıdır.

Yeri gəlmişkən, qeyd etmək lazımdır ki, “Natura” təbii şirəsi mükafatlandırılaraq 2011-ci ilin brendi seçilib. Bu il noyabrın 17-də Qəbələdə “Gilan Holdinq”ə məxsus limonad zavodu da işə salınıb. Çox maraqlı gəzintidən sonra məktəblilər “Qafqaz Riverside Hotel”də furşetə dəvət olunublar. “Qəbələnd” Əyləncə Mərkəzinə maraqlı səyahətdən sonra liseyin müəllim və şagird kollektivi yüksək səviyyədə təşkil olunmuş ekskursiyaya görə müəssisə rəhbərliyinə və kollektivinə dərin təşəkkür edib, gələcək işlərində onlara müvəffəqiyyətlər arzulayıblar.