Sahibkarlıq

Ana səhifə

Sahibkarlıq

Azpromo ötən ilki fəaliyyətin yekunlarına həsr olunmuş hesabatını açıqlayıb

10 yanvar 2012 14:13 (UTC +04:00)

Bakı. Nicat Mustafayev – APA-Economics. Ötən il Azərbaycanda İxracın və İnvestisiyaların Təşviqi Fondu (Azpromo) tərəfindən Azərbaycanın ixrac və investisiya imkanlarının təşviqi, yerli şirkətlərin biznes əlaqələrinin daha da genişləndirilməsi və ölkə iqtisadiyyatına investisiya qoyuluşunun təbliği məqsədilə ölkədə və xaricdə 4 200-ə yaxın iş adamının iştirakı ilə 190 tədbir keçirilib.

İqtisadi İnkişaf Nazirliyindən «APA-Economics»ə verilən məlumata görə, Azərbaycanda keçirilmiş 91 tədbirdən 29-u biznes forum, ikitərəfli işgüzar görüş, 55-i xarici şirkət və təşkilatlarla görüş, 6-cı xarici media şirkətləri ilə görüş və Azərbaycanın müstəqilliyinin 20-ci ildönümünə həsr olunmuş Milli Sərgi olub. Xarici ölkələrdə keçirilmiş 99 tədbirdən 7-ci beynəlxalq sərgi, 28-i biznes forum və seminar, 64-ü isə ikitərəfli görüş olub.

Ötən il ərzində Azpromo Latviya Sahibkarlıq və İnkişaf Agentliyi, Fransa Şirkətlər Hərəkatı (MEDEF), Sloveniya Sahibkarlıq və Xarici İnvestisiyalar üzrə Dövlət Agentliyi, Yunanıstan Xarici Ticarət Şurası, İordaniya Sənaye Palatası, Stavropol Ticarət Sənaye Palatası ilə qarşılıqlı əməkdaşlıq haqqında anlaşma memorandumları imzalayıb.

Bundan başqa, İnvestisiyanın Təşviqi Agentliklərinin Dünya Assosiasiyasının (WAIPA) Direktorlar Şurasına üzv olan Azpromo 2011-ci ildə bu təşkilat tərəfindən keçirilmiş beynəlxalq tədbirlərdə iştirak edib.

Ötən il həmçinin Azpromo-nun Gürcüstandakı nümayəndəliyinin fəaliyyəti genişləndirilib və Avstriyada yeni nümayəndəlik fəaliyyətə başlayıb ki, bununla da qurumun xarici ölkələrdəki nümayəndəliklərinin sayı 2-ə çatıb.

Eyni zamanda, 2011-ci ildə Azpromo ABŞ-da «West Coast Connection» idxal-ixrac şirkətinin yaradılmasına dəstək göstərib ki, bu şirkət hazırda Los-Anceles ştatında fəaliyyət göstərən bir sıra prestijli mağazalarda «Made in Azerbaijan» brendi ilə Azərbaycan məhsullarının satışını həyata keçirir.

Xatırladaq ki, Azpromo 2003-cü ildə İqtisadi İnkişaf Nazirliyi tərəfindən yaradılıb. Hazırda Fondun Himayəçilər Şurasına müxtəlif nazirlik və idarələr, beynəlxalq təşkilatlar, eləcə də özəl şirkətlərin nümayəndələri daxildir.