Sahibkarlıq

Ana səhifə

Sahibkarlıq

Azərbaycanda ötən il vergidən yayınma ilə bağlı 524 cinayət işi başlanıb

11 yanvar 2012 10:02 (UTC +04:00)

Bakı. Əli Əhmədov – APA-Economics. Azərbaycanda vergi cinayətlərinə qarşı mübarizə sahəsində Vergilər Nazirliyi tərəfindən 2011-ci il ərzində vergidən yayınma, qanunsuz sahibkarlıq və digər faktlarla bağlı materiallar üzrə 524 cinayət işi başlanıb. Nazirlikdən «APA-Economics»ə verilən məlumata görə, cinayət işlərinin 367-nin ibtidai istintaqı tamamlanıb, 50 iş ittiham aktı ilə baxılmaq üçün məhkəmələrə göndərilib, 317 işin icraatına xitam verilib, 3 cinayət işi isə hüquq-mühafizə orqanlarına göndərilib.

İbtidai istintaqı tamamlanmış cinayət işlərindən vergiləri ödəməkdən yayınmaya görə 39 iş, qanunsuz sahibkarlığa görə 8 iş, aksiz markası ilə markalanmamış malların satılmasına görə 2 iş, özgə əmlakını mənimsəmə və vəzifə saxtakarlığına görə 1 iş olmaqla cəmi 50 nəfər barəsində 59 cinayət işi baxılmaq üçün aidiyyəti məhkəmələrə göndərilib.

Bir sıra müəssisələrin rəhbərləri və fiziki şəxslər yayındırdıqları vergiləri ibtidai istintaq zamanı tam ödədiklərinə görə barələrində olan 208 cinayət işinə xitam verilib. Cinayət işləri və araşdırılan materiallar üzrə 41,8 mln. manat məbləğində vəsaitin dövlət büdcəsinə ödənilməsi təmin olunub.

Cinayət işləri üzrə keçirilmiş istintaq-əməliyyat tədbirləri nəticəsində vergi cinayətləri törətdiklərinə görə barələrində axtarış elan edilmiş 25 şəxs tutularaq Vergilər Nazirliyi yanında Vergi cinayətlərinin ibtidai araşdırılması Departamentinin istintaq şöbəsinə təhvil verilib, ibtidai istintaqdan yayınan 265 şəxs məcburi qaydada gətirilib, 173 şəxs tapılıb istintaqa cəlb edilib, 143 şəxsin isə yeri müəyyən olunaraq istintaqa məlumat verilib. Vergi yoxlamalarından yayınan 280 nəfər vergi ödəyicisi tapılıb aidiyyəti vergi orqanlarına təqdim olunub.