Sahibkarlıq

Ana səhifə

Sahibkarlıq

Azərbaycanda vergi orqanları 224 min sahibkara telefonla mesaj göndərib

11 yanvar 2012 10:27 (UTC +04:00)

Bakı. Əli Əhmədov – APA-Economics. Azərbaycan Vergilər Nazirliyinin Telefon Məlumat Xidməti 2011-ci il ərzində vergi ödəyiciləri və ümumilikdə əhalidən daxil olmuş 243 362 müraciəti cavablandırıb, vergi ödəyicilərini məlumatlandırmaq məqsədilə 224 205 mesaj göndərib.

Nazirlikdən «APA-Economics»ə verilən məlumata görə, Məlumat Xidmətinə daxil olmuş müraciətlərin 117,5 mini canlı olaraq müfəttiş operatorlar, 125,9 mini isə avtomatik rejimdə elektron operator tərəfindən cavablandırılıb. Müfəttiş operatorlar tərəfindən cavablandırılmış suallar arasında elektron xidmətlər (25,5%), vergi növləri (19,5%), qeydiyyat (15,2%) barədə, avtomatik rejimdə cavablandırılmış suallar arasında isə vergi növləri (77,9%) və dövlət büdcəsinə olan vergi borcları (22,1 %) barədə suallar üstünlük təşkil edib.

Ötən il canlı əlaqə zamanı müfəttiş operatorlar tərəfindən cavablandırılan müraciətlərin sayı 2010-cu ilə nisbətən 62,7% artıb. Canlı əlaqə zamanı müfəttiş operatorlar tərəfindən 4 414 suala əks əlaqə yaradılaraq cavab verilib, 1 060 halda buraxılmış zənglərlə bağlı əks əlaqə yaradılaraq müraciət etmiş şəxslərə müvafiq xidmətlər göstərilib.

İl ərzində vətəndaşlardan şikayət (ərizə) və məlumat xarakterli 555 müraciət qəbul edilərək aidiyyəti üzrə göndərilib.

Vergi ödəyicilərindən daxil olan sualların 99,2%-nə müfəttiş operatorlar dərhal, 0,8%-nə isə sual vərəqəsi tərtib edilərək araşdırıldıqdan sonra cavab veriblər. Sualların 86%-i Bakı şəhərindən, 9,7%-i mobil operatorlardan, qalanı isə ölkənin müxtəlif bölgələrindən daxil olub.