Sahibkarlıq

Ana səhifə

Sahibkarlıq

® Bir qrup jurnalist “Gilan Holding”in Qəbələ Limonad və Konserv zavodlarında olub - FOTOSESSİYA

<font color=red>® </font>Bir qrup jurnalist “Gilan Holding”in Qəbələ Limonad və Konserv zavodlarında olub - <font color=red>FOTOSESSİYA</font>

24 yanvar 2012 07:36 (UTC +04:00)

«APA-Economics»in məlumatına görə, jurnalistlər ilk öncə Qəbələ Limonad Zavodunun meyvələrin saxlanılması üçün meyvə çeşidləmə və meyvə saxlama anbarı, həmçinin zavodun istehsal prosesi və istehsal olunan məhsullarla yaxından tanış olublar. Zavodun müdiri Ramin Nəcəf jurnalistlərə bildirib ki, ötən il dekabrın 17-də prezident İlham Əliyevin iştirakı ilə zavodun rəsmi açılışı olub.

R.Nəcəf qonaqlara ilk olaraq meyvələrin saxlanılması üçün meyvə çeşidləmə və meyvə saxlama anbarı haqqında məlumat verib. Onun sözlərinə görə, soyuducu anbarda tətbiq olunan bütün avadanlıqlar İtaliyadan gətirilib: “Bu anbarda 8 soyuducu kamera mövcuddur ki, onların ümumi tutumu 5 min ton təşkil edir. Anbarların kameralarında bir çox meyvələr, o cümlədən alma, nar, heyva və digər meyvələr saxlanılır. Zavoda meyvə daxil olduqda ilk olaraq məhsullar İtaliya istehsalı olan meyvə çeşidləyən avadanlıqdan keçirilir. Bu avadanlıq meyvələri radiusuna, çəkisinə və rənginə görə ayırır».

R.Nəcəf bildirib ki, alma məhsulu ən çox Quba rayonundan və «Gilan Holding»in Qəbələ rayonu ərazində salınan alma bağlarından toplanılır. «Son 3-4 ay ərzində artıq soyuducu anbara 700 tona yaxın alma məhsulu yığılıb. Sentyabr ayından başlayaraq məhsullar anbara toplanılır və dekabr ayınadək məhsulların emalı və satışına başlanılır. Meyvələri sentyabr ayından başlayaraq soyuducu kameralarda maksimum iyun ayınadək saxlamaq mümkündür. Bu soyuducu kameralarda temperatur meyvələrin çeşidindən asılı olaraq 0-5 dərəcə arasında dəyişir», - deyə R.Nəcəf qeyd edib.

R.Nəcəf daha sonra qonaqlara Qəbələ Limonad Zavodunun istehsal gücü, həmçinin «Jalə» brendi altında istehsal olunan məhsullar haqqında geniş məlumat verib. Onun sözlərinə görə, zavodda saatda 6 min ədəd 1 və 2 litrlik limonad və digər sular istehsal olunur: «Hazırda zavodda 60-dan çox işçi çalışır ki, bu da iki sistemli iş rejiminə imkan verir. Gələcəkdə zavodda üç sistemli iş rejimi tətbiq edildikdən sonra işçilərin sayının 100-ə çatdırılması nəzərdə tutulub».

R.Nəcəf qeyd edib ki, zavod yaxın gələcəkdə 0,33 ml-lik qablarda su və limonad məhsullarının da istehsalına başlamaq niyyətindədir. Belə ki, qeyd olunan həcmdə qabların istehsalı üçün İtaliyadan xüsusi qəliblər də sifariş edilib. Qəliblər zavodun müvafiq avadanlığında təchiz edildikdən sonra su və limonad məhsullarının çeşidlərinin sayının artacağı gözlənilir. Müdir bildirib ki, bütün bu görülən işlərin əsas məqsədi «Regionların sosial-iqtisadi inkişafı Dövlət Proqramı»na uyğun olaraq regionların inkişafının daha da sürətləndirməkdir.

Qəbələ Limonad Zavodu ilə tanışlıqdan sonra jurnalistlər özünəməxsus dadı ilə əhali arasında populyarlıq qazanan «Jalə», «Zolotoy Sad» və «Natura» şirələri istehsal edən Qəbələ Konserv Zavodunda olublar.

Zavodun texniki şöbə müdiri Həbib Şərifov jurnalistləri ilk olaraq zavodun ərazisində yerləşən hazır məhsul saxlanılması üçün istifadə olunan 5 min tonluq anbar bölməsi ilə tanış edib. H.Şərifovun sözlərinə görə, zavod 210 min ton meyvə şirəsi və 70 min ton meyvə püresi illik istehsal gücünə malikdir: «Cənubi Qafqaz regionunda istehsal gücünə görə ən iri meyvə emalı müəssisəsi olan Qəbələ Konserv Zavodu dünya standartlarına cavab verən məhsulları ilə tanınır. Zavod Avropada istehsal olunmuş ən müasir avadanlıqla təchiz olunub. Artıq bu gün zavodun istehsal etdiyi təbii meyvə şirələri, konsentrat və meyvə püreləri yalnız Azərbaycanda deyil, həmçinin Rusiya, Ukrayna, Belarus, Baltikyanı ölkələrdə, həmçinin Amerika və Avropa dövlətlərində də satılır».

Müəssisə ilə bağlı məlumat verən H.Şərifov zavodun 3 hissədən - tetra pak dolum bölməsi, meyvə emalı və şüşə qablı meyvə şirələri bölməsindən ibarət olduğunu deyib. İsveçrə avadanlığı ilə təchiz olunmuş tetra pak dolum bölməsində 1 saata 7 700 ədəd kiçik həcmli tetra pak qablı şirələr istehsal olunur. Bundan başqa, 1 litrlik tetra pak məhsulların istehsal gücü 1 saata 5 500 ədəd, 1 litrlik prizma formalı tetra pak məhsullarının istehsal gücü isə 1 saata 7 ədəddən çox olur.

Jurnalistlər daha sonra zavodun meyvə emalı bölməsi ilə tanış olublar. Jurnalistləri bu bölmə ilə zavodun istehsal müdiri İxtiyar Əliyev tanış edib. İ.Əliyev meyvə emalı bölməsində alma, heyva, nar və digər məhsulların qəbul olunduğunu, həmçinin meyvələrin yuyularaq çeşidləndiyini, daha sonra isə emala və satışa göndərildiyini bildirib: «Bölmə sutkada 350 ton nar qəbul etmə imkanına malikdir. Artıq oktyabr ayından başlayaraq meyvə emalı bölməsinə indiyədək 12 min tona yaxın nar məhsulu qəbul olunub. Hazır nar şirələri ən çox ABŞ, Avstriya, Rusiya, Yeni Zelandiya və Baltikyanı ölkələrə ixrac olunur. Təkcə hər ay 7 min şüşə (1 litrlik) nar şirəsi ABŞ-dan, 32 min şüşə isə (1 litrlik) Baltikyanı ölkələrdən sifariş olunur».

Sonda zavodun şüşə qablı şirələr istehsal olunan bölməsinə baxış keçirilib. Bu bölmədə isə 1 saat ərzində 5 ədəd şüşə qablı şirələr istehsal olunduğu qeyd olunub.

Qeyd edək ki, Qəbələ Konserv Zavodunun təməli 2005-ci ildə qoyulub və 1 il ərzində tikinti işləri başa çatdırılıb.