Sahibkarlıq

Ana səhifə

Sahibkarlıq

Azərbaycanda ilin ilk güzəştli kreditləri məcburi köçkünlərə verilib

24 yanvar 2012 13:10 (UTC +04:00)

Bakı. Nicat Mustafayev - APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) tərəfindən Xocavənd rayonunda «Sahibkarlığın inkişafına dövlət dəstəyi» mövzusunda 2012-ci ilin ilk tədbiri keçirilib.

Nazirlikdən «APA-Economics»ə verilən məlumata görə, tədbirdə Xocavənd və Qarabağın işğal altında olan digər rayonlarından 130-a yaxın məcburi köçkün iştirak edib.

Tədbirdə Xocavənd qəsəbəsində güzəştli kreditlər hesabına maliyyələşdirilməsi məqsədəuyğun hesab olunan kiçik həcmli cins heyvandarlıq təsərrüfatlarının, çörək istehsalı müəssisəsinin, tikiş sexinin və tamet (plitə daşları) istehsalı sexinin yaradılması üzrə nümunəvi investisiya layihələrinin təqdimatı keçirilib, bu layihələrin ümumi dəyərinin 100%-dək hissəsinin dövlətin güzəştli kreditləri hesabına maliyyələşdiriləcəyi bildirilib.

Tədbirdə çıxış edən SKMF-in icraçı direktoru Şirzad Abdullayev 2011-ci ildə Fondun fəaliyyətinin yekunları, güzəştli kreditlər hesabına məcburi köçkünlərin məskunlaşdığı ərazilərdə həyata keçirilən layihələr barədə məlumat verib və bildirib ki, ötən il Fondun vəsaitləri hesabına sahibkarlıq subyektlərinin 1 643 investisiya layihəsinin maliyyələşdirilməsinə 138 mln. manat, o cümlədən 162 məcburi köçkün sahibkara 5,9 mln. manat güzəştli kredit verilib. Bu layihələrin həyata keçirilməsi 6 500-dək yeni iş yerinin yaradılmasına imkan verir.

Ş.Abdullayev həmçinin 2012-ci ildə sahibkarların investisiya layihələrinin maliyyələşdirilməsinə Fondun tarixində ilk dəfə olaraq maksimal məbləğdə - 200 mln. manat vəsaitin verilməsi proqnozlaşdırıldığını qeyd edib.

Tədbir çərçivəsində müvəkkil kredit təşkilatları vasitəsilə 49 sahibkara 459 min manat, o cümlədən Xocavənd və işğal edilmiş digər rayonlardan olan 38 məcburi köçkün sahibkara 332 min manat güzəştli kredit vəsaiti verilib ki, bu kreditlər hesabına da 70-ə yaxın yeni iş yeri yaradılacaq.