Sahibkarlıq

Ana səhifə

Sahibkarlıq

Ötən il Azərbaycanda 111 ixtiraya patent verilib

30 yanvar 2012 14:35 (UTC +04:00)

Bakı. Əli Əhmədov - APA-Economics. Ötən il ərzində Standartlaşdırma, Metrologiya və Patent üzrə Dövlət Komitəsi tərəfindən 77 standart təsdiqlənib.

Komitədən “APA-Economics”ə verilən məlumata görə, İSO (Beynəlxalq Standartlaşdırma Təşkilatı), EN (Avropa Birliyi), Kodeks Alimentarius, türk standartları və digər regional standartlar əsasında yeyinti sahəsi üzrə 26 standart, neft-kimya sahəsi üzrə 15 standart, elektrotexnika sahəsi üzrə 5 standart təsdiqlənib. Bundan başqa, nəqliyyat sahəsi üzrə 2 standart, ekologiya sahəsi üzrə 9 standart, tikinti sahəsi üzrə 5 standart, digər sahələr üzrə 15 standart işlənib hazırlanaraq dövlət qeydiyyatına alınıb.

Hesabat dövrü ərzində komitə tərəfindən 1250 əmtəə nişanına dair şəhadətnamə, 111 ixtiraya dair patent, 43 sənaye nümunəsinə dair patent, 9 faydalı modelə dair patent verilib. Ötən il 56 laboratoriya akkreditasiya olunaraq dövlət reyestrində qeydiyyata alınıb, 132 laboratoriyanın akkreditasiya attestatlarının qüvvədə olma müddəti uzadılıb.

2011-ci il ərzində Komitənin Ərazi Dövlət Nəzarəti İdarələri tərəfindən dövlət nəzarəti qaydasında 1537 yoxlama aparılıb, 662 pozuntu halı aşkarlanıb. Bununla bağlı 662 iradnamə və 611 tələbnamə verilib, 49 təsərrüfat subyekti barəsində ümumilikdə 156 min manat məbləğində inzibati tənbeh təsdiq edilib, 8 müəssisə barəsində sənədlər baxılması üçün məhkəməyə göndərilib, 4 sahibkarlıq subyektinin fəaliyyətində cinayət tərkibi olduğu üçün barəsində tərtib edilmiş sənədlər hüquqi qiymət verilməsi üçün prokurorluğa göndərilib.

İstehsal olunan məhsulların sınaqlarının nəticələrinin mənfi olması səbəbindən 2200 kq şokolad və vafli, 85 kq şərq şirniyyatı və biskvitli kremli tort, 60 kq nabat şəkilli karamel, 134 kq yağ, 5528 litr alkoqolsuz içki, 2267 litr süd və süd məhsulları, 30 765 litr nar şirəsi, 4500 litr alkoqollu içki qanunvericilikdə nəzərdə tutulan qaydada məhv edilib.