Sahibkarlıq

Ana səhifə

Sahibkarlıq

Azərbaycanda «Hüquqi şəxslərin elektron qeydiyyatı Sistemi»nin təqdimatı keçirilib - FOTO

Azərbaycanda «Hüquqi şəxslərin elektron qeydiyyatı Sistemi»nin təqdimatı keçirilib - <font color=red>FOTO</font>

07 fevral 2012 13:07 (UTC +04:00)

«APA-Economics»in məlumatına görə, tədbirdə çıxış edən vergilər nazirinin müavini Sahib Ələkbərov ölkədə sahibkarlıq subyektlərinin qeydiyyatının sadələşdirilməsi istiqamətində son illər ölkədə görülən işlər barədə məlumat verərək 2008-ci ildən bu sahədə «bir pəncərə» sisteminin, 2011-ci ilin iyulun 1-dən fiziki şəxslərin elektron qeydiyyatının tətbiq olunduğunu xatırladıb. Onun sözlərinə görə, elektron qeydiyyatın başladığı vaxtdan sonra ötən il 10 075 fərdi sahibkar elektron qeydiyyatdan keçib: «Hüquqi şəxslərin elektron qeydiyyatına başlanması isə bu işlərin davamı olmaqla yanaşı, ölkədə elektron hökumətin yaradılması sahəsində mühüm hadisədir».

Yeni sistemi təqdim edən Nazirliyin İqtisadi təhlil və sahibkarlıq subyektlərinin dövlət qeydiyyatı Baş İdarəsinin rəisi Natiq Şirinov bildirib ki, hüquqi şəxslərin elektron qeydiyyatına hazırlıq mərhələsində qanunvericiliyə lazımi dəyişikliklər edilib: «Dövlət rüsumu haqqında» və «Hüquqi şəxslərin dövlət qeydiyyatı və dövlət reyestri haqqında» qanunlara, eləcə də Mülki Məcəlləyə və İnzibati Xətalar Məcəlləsinə edilən dəyişikliklərə əsasən, elektron qeydiyyat rüsumsuz aparılır, nizamnamə kapitalının əvvəlcədən ödənilməsi və e-qeydiyyat zamanı ərizənin notarial qaydada təsdiqlənməsi tələb olunmur». Bundan başqa, qeydiyyat zamanı Vergilər Nazirliyinə yanlış məlumatların verilməsinin qarşısını almaq məqsədilə İnzibati Xətalar Məcəlləsinə belə hallara yol vermiş fiziki şəxslərin 700 manat, hüquqi şəxslərin isə 4 000 manat cərimə olunması barədə maddə əlavə edilib.

Tədbirdə çıxış edən Azərbaycan Sahibkarlar Konfederasiyasının prezidenti Məmməd Musayev hüquqi şəxslərin elektron qeydiyyatının yerli biznesin inkişafına böyük dəstək verəcəyini bildirib.

Azərbaycanda Amerika Ticarət Palatasının (AmCham) qanunvericilik və siyasət üzrə əlaqələndiricisi Şahid Şükürov yeni sistemin tətbiqini yüksək qiymətləndirərək AmCham-ın Vergilər Nazirliyini ölkədə müasirləşmə işində ən qabaqcıl dövlət orqanı hesab etdiyini bildirib: «Bu işlər təkmilləşmənin həyata keçirilməsinin çətinliyi ilə bağlı bəhanələrin yersiz olduğunu göstərir».

Beynəlxalq Maliyyə Korporasiyasının layihə rəhbəri İrina Niderberqer elektron qeydiyyatın belə tez tətbiqindən və bu sahədə işlərin sürətlə aparılmasından təəccübləndiyini bildirib: «İnana bilmirdim ki, bu müddətə bütün bu işləri çatdırmaq olar, amma siz buna nail oldunuz». Onun sözlərinə görə, bu işlərin biznesə təsirini statistik rəqəmlər də göstərir: «Belə ki, «bir pəncərə» sistemi tətbiq olunandan sonra iqtisadi fəaliyyət iştirakçılarının sayı 30% artıb, bu isə həm də yeni iş yerlərinin yaradılması deməkdir».

Prezident Administrasiyası hüquq-mühafizə orqanları ilə iş şöbəsinin baş məsləhətçisi, Korrupsiyaya qarşı mübarizə üzrə Komissiyasının katibi İnam Kərimov elektron qeydiyyatın şəffaflığın təmini və korrupsiyaya qarşı mübarizəyə ciddi dəstək verəcəyini bildirib: «Elektron xidmətlərin tətbiqi nəticəsində dövlət orqanları üzərinə düşən vəzifələri daha səmərəli icra edir və ölkə vətəndaşları bundan bəhrələnir. Məqsədimiz elektron xidmətlərin digər sahələrdə də tətbiqidir. Xidmətlərin elektronlaşması biznes mühitinin yaxşılaşmasına da kömək edir».