Sahibkarlıq

Ana səhifə

Sahibkarlıq

Gürcüstan-Azərbaycan-Türkiyə biznes-forumu keçirilib - FOTOSESSİYA

Gürcüstan-Azərbaycan-Türkiyə biznes-forumu keçirilib - <font color=red>FOTOSESSİYA</font>

16 fevral 2012 13:36 (UTC +04:00)

“APA-Economics”in Gürcüstan bürosunun məlumatına görə, biznes-forumdan əvvəl hər üç ölkənin nümayəndə heyətlərinin rəhbərləri - Azərbaycanın iqtisadi inkişaf naziri Şahin Mustafayev, Türkiyənin iqtisadiyyat naziri Zəfər Çağlayan, Gürcüstanın sabit inkişaf və iqtisadiyyat naziri Vera Kobaliya arasında görüş keçirilib.

Sonra Türkiyə Palatalar və Birjalar Birliyinin (Türkiye Odalar ve Borsalar Birliyi – TOBB), “İnvest in Georgia” (Gürcüstan) və Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Gürcüstan, Azərbaycan və Türkiyənin 200-dən çox iş adamının iştirak etdiyi biznes-forum başlayıb. Tədbiri AZPROMO-nun prezidenti Adil Məmmədov açıb. Forumda TOBB prezidenti Rıfat Hisarcıklıoğlu, Gürcüstanın sabit inkişaf və iqtisadiyyat naziri Vera Kobaliya, Azərbaycanın iqtisadi inkişaf naziri Şahin Mustafayev, Türkiyənin iqtisadiyyat naziri Zəfər Çağlayan çıxış ediblər.

Ş. Mustafayev Azərbaycan-Türkiyə-Gürcüstan əlaqələrinin strateji tərəfdaşlığa çevrildiyini bildirib: “Mən bu üçtərəfli forumu yüksək qiymətləndirir və qeyd edirəm ki, bu tədbir ölkələrimiz arasındakı iqtisadi əməkdaşlığın genişləndirilməsində növbəti addım olacaq. Yeri gəlmişkən, bildirim ki, bu təşəbbüsün sahibi Azərbaycan prezidenti İlham Əliyevdir”.

Ş. Mustafayev hər üç ölkənin hazırda Bakı-Tiflis-Qars layihəsini icra etdiyini xatırladıb: “Bakı-Tiflis-Qars bizim üçün önəmli və iqtisadi baxımdan çox səmərəli bir layihədir. Biz yekunda çox sevindirici nəticələr gözləyirik. Gözləyirik ki, bu dəmir yolu Qarsdan Naxçıvana da çəkiləcək və beləliklə, Azərbaycanın Naxçıvanla dəmiryolu əlaqəsi bərpa olunacaq. ”AGRİ” layihəsini biz Gürcüstan və digər tərəfdaşlarımızla birlikdə həyata keçirməyə çalışırıq. Mən Gürcüstanda ARDNŞ-in xüsusi fəaliyyətini qeyd etmək istəyirəm. Bu şirkət Gürcüstanda qazpaylayıcı şəbəkələr yaradıb və 94 yanacaqdoldurma məntəqəsi istifadəyə verib. Bizim Türkiyə ilə də energetika sayəsində əməkdaşlığımız genişlənir. Bu, ARDNŞ-in fəaliyyəti ilə bağlıdır. Keçən il İzmir neft emalı zavodunun təməli qoyuldu. İndi Trans-Anadolu qaz kəməri və İzmirdə elektrik stansiyasının tikintisi üzərində işləyirik. Azərbaycan şirkətləri Gürcüstana son beş ildə 800 milyon dollar sərmayə yatırıb. Ölkədə Azərbaycanın 272 şirkəti qeydiyyatdan keçib və onlar Gürcüstanda 7 min iş yeri yaradıblar. Azərbaycan Gürcüstanla bilikdə Avropanın enerji təhlükəsizliyini təmin edir. Azərbaycan Orta Asiyanın enerji resurslarını Gürcüstan və Türkiyə vasitəsilə Avropaya ixrac edir. Bugünkü görüşlər və sahibkarların iştirakı ölkələrimizin potensialının reallaşdırılmasına xidmət edəcək”.

Tədbirdə iş adamlarının iştirakı ilə kənd təsərrüfatı, tikinti, turizm, tekstil, enerji, əmlak və əczaçılıq sahələrində əməkdaşlıq məsələləri müzakirə olunub. Qərara alınıb ki, ikinci görüş ya Azərbaycan, ya da Türkiyədə (Qars şəhərində) keçirilsin.