Sahibkarlıq

Ana səhifə

Sahibkarlıq

Fevralda Azərbaycanda 3 mindən artıq vergi ödəyicisində qanun pozuntusu aşkarlanıb

07 mart 2012 12:47 (UTC +04:00)

Bakı. Əli Əhmədov –APA-Economics. Vergilər Nazirliyi əməkdaşlarının keçirdiyi tədbirlər nəticəsində 2012-ci ilin fevral ayı ərzində 3 226 vergi ödəyicisində qanunvericiliyin pozulması faktları aşkar edilib.

Nazirlikdən «APA-Economics»ə verilən məlumata görə, 1 687 vergi ödəyicisi tərəfindən nağd hesablaşmaların aparılması qaydalarının pozulduğu, 346 vergi ödəyicisi tərəfindən qanunla nəzərdə tutulmayan valyutanın ödəniş vasitəsi kimi qəbul olunduğu və valyutanın ticarət, iaşə və xidmət müəssisələrində qanunvericiliklə müəyyən edilmiş qaydalar pozulmaqla alınıb-satıldığı və ya dəyişdirildiyinə, 192 vergi ödəyicisinin vergi orqanlarında uçota durmadan fəaliyyət göstərdiyi, 619 vergi ödəyicisinin xüsusi razılıq (lisenziya) tələb olunan fəaliyyət növləri ilə belə razılıq (lisenziya) almadan məşğul olduğu müəyyən edilib.

Operativ nəzarət tədbirləri zamanı 224 vergi ödəyicisi tərəfindən 454 nəfər fiziki şəxsin əmək müqaviləsi bağlamadan işə cəlb edildiyi, 123 vergi ödəyicisi tərəfindən fərqlənmə nişanı olmadan avtomobil nəqliyyatı ilə sərnişin daşındığı, 35 vergi ödəyicisində aksiz markaları ilə müvafiq qaydada markalanmamış 499 ədəd mal olduğu aşkarlanıb. Nazirliyin məlumatına görə, qeyd olunan faktlarla bağlı qanuna müvafiq tədbirlər görülüb.