Sahibkarlıq

Ana səhifə

Sahibkarlıq

Gəncədəki “Metallurq” İdman Kompleksini yerli fiziki şəxs özəlləşdirib

14 mart 2012 14:33 (UTC +04:00)

Bakı. Əli Əhmədov - APA-Economics. Əmlak Məsələləri Dövlət Komitəsi “Metallurq” İdman Kompleksinin özəlləşdirilməsi ilə bağlı investisiya müsabiqəsinə yekun vurub.

Komitədən «APA-Economics»ə verilən məlumata görə, investisiya müsabiqəsi “Səhiyyə, təhsil, idman və mədəniyyət sahələrində bir sıra müəssisə və obyektlərin özəlləşdirilməsi haqqında” Azərbaycan prezidentinin 23 avqust 2006-cı il tarixli sərəncamının icrası çərçivəsində elan olunub.

Qeyd edək ki, “Metallurq” İdman Kompleksi Gəncə şəhəri, T. Arani küçəsi-6 ünvanında yerləşir. Kompleksin qeyri-maddi aktivləri, işçiləri, maliyyə öhdəlikləri və debitor borcları yoxdur. Kompleksin start satış qiyməti 265 625 manatdır.

Müsabiqədə Azərbaycanın hüquqi və fiziki şəxsləri ilə yanaşı, xarici investorlar da iştirak edə bilərdi. Müsabiqəyə yekun vurularkən müəyyən edilmiş şərtlər nəzərə alınmaqla maksimum həcmdə investisiya təklif etmiş və onun səmərəli qoyuluşu üzrə öhdəlik götürmüş iddiaçıya üstünlük verilməsi nəzərdə tutulurdu.

Müsabiqədə iştirak etmək üçün iki iddiaçı tərəfindən ərizə və investisiya təklifləri təqdim edilib və Müsabiqə Komissiyasının qərarına əsasən, hər iki iddiaçı iştirakçı statusunu əldə edib. Komissiyanın açıq səsvermə yolu ilə qəbul etdiyi qərara əsasən, fiziki şəxs Babayev Taleh Fayıq oğlu “Metallurq” İdman Kompleksinin satışı üzrə investisiya müsabiqəsinin qalibi elan edilib.

Müsabiqənin şərtlərinə müvafiq olaraq qalib 100 min manat məbləğində pul vəsaitinin dövlət büdcəsinə köçürülməsini, habelə İnvestisiya Proqramına əsasən 3 ay ərzində 350 min manat məbləğində investisiya qoyuluşunun yerinə yetirilməsini öhdəsinə götürüb. Nəzərdə tutulan investisiyalar idman kompleksinin futbol meydançasının tribunasındakı oturacaqların təmiri və boyanması, meydançanın abadlaşdırılması və işıqlandırılması, eləcə də soyunub-geyinmə və duş otaqlarının təmiri işlərinə yönəldiləcək. İnvestisiya Proqramına əsasən, müvafiq işlərin həyata keçirilməsi nəticəsində kompleksdə yeni iş yerlərinin yaradılması nəzərdə tutulub.