Sahibkarlıq

Ana səhifə

Sahibkarlıq

Azərbaycanda biznesin idarə olunması sahəsində Almaniya-Azərbaycan ikitərəfli Proqramının icrasına dair seminar keçirilib

15 mart 2012 12:20 (UTC +04:00)

Bakı. Nicat Mustafayev - APA-Economics. Azərbaycan İqtisadi İnkişaf Nazirliyinin dəstəyi və Bakı Biznes Tədris Mərkəzinin təşkilatçılığı ilə Bakıda «Azərbaycanda biznesin idarə olunması sahəsində kadrların ixtisasının artırılması üzrə Almaniya-Azərbaycan ikitərəfli Proqramı»nın icrasına həsr olunmuş seminar keçirilib.

Nazirlikdən «APA-Economics»ə verilən məlumata görə, tədbirdə İqtisadi İnkişaf Nazirliyinin, Bakı Biznes Tədris Mərkəzinin, Almaniyanın GİZ təşkilatının nümayəndələri, beynəlxalq ekspertlər, eləcə də 2012-ci ilin iyun-iyul aylarında «İqtisadi kooperasiya» üzrə Almaniyada ixtisasartırma kursunu keçmək üçün müsabiqəyə sənəd təqdim etmiş, iqtisadiyyatın müxtəlif sahələrində fəaliyyət göstərən 70-dən çox sahibkar və menecer iştirak edib.

Seminarda çıxış edən İqtisadi İnkişaf Nazirliyinin Sahibkarlığın inkişafı siyasəti şöbəsinin müdir müavini Elçin İbrahimov maarifləndirmə tədbirlərinin sahibkarlıq fəaliyyətinin səmərəli təşkilində rolundan bəhs edib, Almaniyada təşkil edilmiş ixtisasartırma kurslarının əhəmiyyəti barədə məlumat verib, bu proqramın gələcəkdə də davam etdirilməsinin Azərbaycan gənclərinin menecment sahəsində beynəlxalq təcrübəyə yiyələnməsi, iş adamları arasında işgüzar əlaqələrin genişlənməsi baxımından əhəmiyyətini vurğulayıb.

Bakı Biznes Tədris Mərkəzinin direktoru Akif Fərruxov, Almaniyanın GİZ təşkilatının layihələr üzrə rəhbəri Ronald Şults və beynəlxalq ekspert Vladislav Belov, «Baden Vüttenberq İxrac Akademiyası» Tədris Mərkəzinin nümayəndəsi Gabriel Bise çıxışlarında «Azərbaycanda biznesin idarə olunması sahəsində kadrların ixtisasının artırılması üzrə Almaniya-Azərbaycan ikitərəfli Proqramı» və ixtisasartırma kursunun uğurlu nəticəsi barədə məlumat veriblər və bildiriblər ki, proqramım fəaliyyət müddəti ərzində iqtisadiyyatın müxtəlif sahələrində fəaliyyət göstərən 88 nəfər sahibkar və gənc menecerlər Almaniyanın Karl Duysberq, Baden-Vüttenberq və digər tədris mərkəzlərində tədris, Berlin, Bonn və s. şəhərlərində müvafiq sahələr üzrə müəssisələrdə təcrübə keçib. Bakı Biznes Tədris Mərkəzi zəruri peşəkarlığa və xarici dil qabiliyyətinə malik namizədlərin seçilməsi işini təşkil edib, uyğun gələn namizədlərin və regionlar üzrə özəl sektor nümayəndələrinin proqramda iştirakını təmin edib. Kurs müddətində menecerlər Almaniyada ixtisaslaşdırılmış məşğələ və praktiki treninqlərlə müşayiət olunan müxtəlif məzmunlu təcrübə keçmək məqsədilə müəssisələrə səfərlər də edib. Bununla yanaşı, Proqram çərçivəsində Almaniyanın müvafiq şirkətləri ilə yeni işgüzar əlaqələr yaradılıb, biznes müqavilələri imzalanıb.

Sonra 2012-ci ilin iyun-iyul aylarında Almaniyada 1 ay müddətində «İqtisadi kooperasiya» ixtisasartırma kursunu keçmək üçün sənədlərini təqdim etmiş namizədlər arasında müsabiqə başlayıb.

Almaniyanın GİZ təşkilatının layihələr üzrə rəhbəri Ronald Şults və beynəlxalq eksperti V.Belov, «Baden Vüttenberq İxrac Akademiyası» Tədris Mərkəzinin nümayəndəsi G.Bise tərəfindən keçirilən müsabiqə martın 16-dək davam edəcək. Müsabiqədə iqtisadiyyatın müxtəlif sahələrində fəaliyyət göstərən 73 nəfər sahibkar və menecerlər iştirak edir.