Sahibkarlıq

Ana səhifə

Sahibkarlıq

Son üç ildə Azərbaycanda 15 minədək yeni müəssisə açılıb

15 mart 2012 13:42 (UTC +04:00)

Bakı. Nicat Mustafayev – APA-Economics. Azərbaycan regionlarının sosial-iqtisadi inkişafı Dövlət Proqramı (2009-2013-cü illərdə) çərçivəsində ölkə üzrə 14,7 min müəssisə fəaliyyətə başlayıb. APA-Economics»in məlumatına görə, bunu Azərbaycanın iqtisadi inkişaf naziri Şahin Mustafayev bildirib.
Nazirin sözlərinə görə, 2009-cu ildən ötən müddət ərzində Dövlət Proqramının icrası nəticəsində ölkə üzrə 14,7 min müəssisə fəaliyyətə başlayıb və 241 min yeni iş yeri yaradılıb ki, bunun 180 mini daimi olub: «Ən mühüm göstəricilərdən biri yoxsulluq səviyyəsinin 7,6%-ə enməsidir».
Ş.Mustafayev onu da qeyd edib ki, ötən il regionların sosial-iqtisadi inkişafının infrastruktur təminatının gücləndirilməsi mühüm istiqamət kimi diqqət mərkəzində saxlanılıb, regionların inkişafına 6 mlrd. manatdan çox əsas kapitala vəsait yönəldilib.
«Ölkənin sosial-iqtisadi inkişafı sahəsində tətbiq olunan məqsədyönlü siyasət nəticəsində 2011-ci il ərzində 72,4 mini daimi olmaqla 94 min yeni iş yeri və 5 mindən çox müəssisə açılıb. Dövlət Proqramı çərçivəsində regionlarda infrastrukturun bərpası və inkişafı, əhalinin kommunal xidmətlərlə, o cümlədən elektrik enerjisi, qaz və su ilə təchizatının yaxşılaşdırılması, səhiyyə və təhsil müəssisələrinin tikintisi, əhalinin sosial vəziyyətinin daha da yaxşılaşdırılması istiqamətində mühüm tədbirlər həyata keçirilib, bu sahəyə irihəcmli dövlət investisiyaları yönəldilib», - deyə Ş.Mustafayev vurğulayıb.
Nazir həmçinin bildirib ki, 2004-2008-ci illəri əhatə edən birinci Dövlət Proqramının icrası müvəffəqiyyətlə başa çatıb. Proqram çərçivəsində görülən işlər nəticəsində ölkədə makroiqtisadi sabitliyin və davamlı inkişafın təmin edilməsi, o cümlədən iqtisadi və inzibati rayonlar üzrə həyata keçirilmiş tədbirlər öz real bəhrəsini verib, iqtisadiyyatın dinamik inkişafı təmin edilib: «Dövlət Proqramının icra olunduğu 2004-2008-ci illər ərzində ÜDM-in real həcmi 2,6 dəfə, qeyri-neft sektoru 1,8 dəfə artıb, o cümlədən sənayedə 2,5 dəfə, kənd təsərrüfatında 25,2%-lik artıma nail olunub. Bu dövrdə 27,5 mindən çox yeni müəssisə yaradılıb, 547,6 mini daimi olmaqla 766,3 min yeni iş yeri açılıb, əhalinin gəlirləri 4 dəfə yüksəlib».