Sahibkarlıq

Ana səhifə

Sahibkarlıq

Azərbaycan sahibkarları Almaniyada ixtisasartırma kurslarında iştirak edirlər - FOTOSESSİYA

Azərbaycan sahibkarları Almaniyada ixtisasartırma kurslarında iştirak edirlər - <font color=red>FOTOSESSİYA</font>

12 aprel 2012 15:15 (UTC +04:00)

Bakı. Əli Əhmədov - APA-Economics. Azərbaycan iqtisadiyyatının müxtəlif sahələrində fəaliyyət göstərən 88 sahibkar və menecer 2009-2011-ci illərdə Almaniyada ixtisasartırma kursu keçib. «APA-Economics»in məlumatına görə, bu barədə bu gün İqtisadi İnkişaf Nazirliyində (İİN) «Azərbaycanla Almaniya arasında iqtisadi kooperasiya əlaqələrinin genişləndirilməsi» mövzusunda keçirilən konfransda bildirilib. Konfransda İİN-in, Almaniya İqtisadiyyat və Texnologiyalar Nazirliyi, GIZ təşkilatının nümayyəndələri, eləcə də 2009-2011-ci illərdə Almaniyada ixtisasartırma kurslarında iştirak etmiş 30-dan çox sahibkar və menecer iştirak ediblər.

Qeyd edək ki, Azərbaycanda biznesin idarə olunması sahəsində kadrların ixtisasının artırılması üzrə Almaniya-Azərbaycan ikitərəfli Proqramı çərçivəsində Azərbaycandan olan sahibkarlar və menecerlər Almaniyada 1 ay müddətində «iqtisadi kooperasiya» üzrə ixtisasartırma kursu keçirlər. Konfransda qeyd edilib ki, indiyədək iqtisadiyyatın müxtəlif sahələrində fəaliyyət göstərən 88 nəfər sahibkar və gənc menecerlər Almaniyanın Karl Dyusberq, Baden-Vüttenberq və digər tədris mərkəzlərində tədris, Berlin, Bonn və s. şəhərlərində müvafiq sahələr üzrə fəaliyyət göstərən müəssisələrdə təcrübə keçiblər.

İİN aparatının rəhbəri Samir Vəliyev ixtisasartırma kurslarının əhəmiyyəti barədə məlumat verərək bu proqramın gələcəkdə də davam etdirilməsinin azərbaycanlı iş adamlarının menecment sahəsində beynəlxalq təcrübəyə yiyələnməsi, işgüzar əlaqələrin genişlənməsi, iki ölkə arasında iqtisadi əlaqələrin daha da inkişafı baxımından əhəmiyyətini vurğulayıb.

Tədbirdə çıxış edən Almaniya Federal İqtisadiyyat və Texnologiyalar Nazirliyinin Avropa siyasəti Departamentinin direktor müavini Andreas Oberşteller bildirib ki, proqram iştirakçıları Almaniyada öz peşə-hazırlıq səviyyələrinin yüksəldilməsi ilə yanaşı, Almaniya müəssisələri ilə birbaşa işgüzar əlaqələr də yaradırlar. Bu isə, öz növbəsində, Almaniya ilə Azərbaycan arasında işgüzar əlaqələrin, o cümlədən iqtisadi kooperasiya əlaqələrinin inkişafında əhəmiyyətlidir.

Qeyd edək ki, sahibkarların Proqramla bağlı məlumatlandırılmasında, namizədlərin seçilməsi və onların ixtisasartırma kurslarına cəlb olunmasında Bakı Biznes Tədris Mərkəzi də fəal iştirak edib.

Bakı Biznes Tədris Mərkəzinin direktoru Akif Fərruxov bildirib ki, sahibkar və menecerlərin Almaniyada pulsuz kurs keçməsi Azərbaycanda sahibkarlığa dövlət dəstəyinin mühüm elementlərindən biridir.

Kursa gedən sahibkarlar Azərbaycan iqtisadiyyatının müxtəlif sahələrində, o cümlədən aqrar sahədə, quşçuluq, heyvandarlıq və bitkiçilik sahəsində fəaliyyət göstərirlər. Proqramın ən mühüm nəticələrindən biri iş adamları və menecerlərin kursda olduğu müddətdə Almaniya şirkətləri ilə əməkdaşlıq əlaqələri yaratmasıdır: «Bu 88 nəfərin böyük əksəriyyəti artıq alman şirkətləri ilə əlaqə yaradıblar və imzalanmış müqavilələr də var».

Artıq iyun-iyul aylarında keçiriləcək növbəti kurslarda iştirak edəcək 25 iş adamı da müsabiqə yolu ilə seçilib. A.Fərruxovun sözlərinə görə, proqramın daha da genişləndirilməsi nəzərdə tutulur. Bundan başqa, hazırda bu kurslarda ingilis dilini bilən sahibkar və menecerlər iştirak edə bilərlər. Gələcəkdə isə rus dilini bilən sahibkarlar üçün də belə kursların təşkili planlaşdırılır.