Sahibkarlıq

Ana səhifə

Sahibkarlıq

Rusiyanın Kurqan vilayətinin qubernator müavini: “Azərbaycanla iqtisadiyyatın bütün sahələrində birgə müəssisələr yaratmağa hazırıq”

24 aprel 2012 14:42 (UTC +04:00)

Bakı. Nicat Mustafayev - APA-Economics. Azərbaycan və Rusiya Federasiyasının Kurqan vilayəti arasında birgə müəssisələr yaradıla bilər. “APA-Economics”in xəbərinə görə, bu barədə Kurqan vilayətinin qubernator müavini Vasili Jarov bildirib.

Onun sözlərinə görə, tərəflər arasında bir sıra sahələr üzrə danışıqlar aparılıb: “Bunun nəticəsində Azərbaycan və Kurqan vilayətinin şirkətləri arasında sazişlər imzalanacağı gözlənilir. Bu da gələcəkdə tərəflər arasında ticarət-iqtisadi əməkdaşlığı bir qədər də inkişaf etdirəcək”.

V.Jarov qeyd edib ki, Kurqan vilayətində sənaye və kənd təsərrüfatı kimi sahələr yaxşı inkişaf edib: “Rusiyada istehsal olunan avtobusların 40%-i, yanğınsöndürmə avadanlıqlarının 35%-i Kurqan vilayətinin payına düşür”.

Bundan başqa, Kurqan vilayətində yüksək növ taxıl istehsal olunur: “Ötən il Azərbaycana 20 min ton taxıl ixrac etmişik. Bu taxılın maya dəyəri azdır. Rəsmi Bakının dəmir yolu ilə nəqletmə xərclərinin 50%-ni bizə güzəştə getdiyini də nəzərə alsaq, gələcəkdə Azərbaycana ixrac etdiyimiz taxılın həcminin artacağını proqnozlaşdıra bilərik”.

Qubernator müavini Azərbaycana neft-qaz hasilatında işlədilən avadanlıqlar ixrac edə biləcəklərini də söyləyib: “Azərbaycan tərəfi ilə birgə biznes qurmağa, o cümlədən iqtisadiyyatın bütün sahələrində birgə müəssisələr yaratmağa hazırıq”.

V.Jarov hazırda tərəflər arasında mövcud olan ticarət əlaqələrinin səviyyəsini qənaətbəxş saymadıqlarını vurğulayıb: “İkitərəfli ticarət əlaqələrinin potensialı böyükdür və buna əsasən deyə bilərik ki, gələcəkdə qarşılıqlı ticarət dövriyyəsinin həcmi artacaq. Biz Azərbaycan nümayəndə heyətinin Kurqan vilayətinə səfər etməsini və səfər çərçivəsində çərçivə sazişləri deyil, konkret sahələr üzrə sazişlər imzalanmasını təklif etmişik”.