Sahibkarlıq

Ana səhifə

Sahibkarlıq

Bakı qəsəbələrində sahibkarlara 3,2 mln. manat güzəştli kredit vəsaiti verilib

27 aprel 2012 10:22 (UTC +04:00)

Bakı. Elnur Hüseynquluyev - APA-Economics. İqtisadi İnkişaf Nazirliyinin (İİN) Sahibkarlığa Kömək Milli Fondu (SKMF) “Sahibkarlığın inkişafına dövlət dəstəyi” mövzusunda növbəti tədbirini bu gün Binəqədi rayonunun Binəqədi qəsəbəsində keçirib.

“APA-Economics”in xəbərinə görə, tədbirdə Bakı qəsəbələrində fəaliyyət göstərən 140-a yaxın sahibkar iştirak edib.

Tədbirdən əvvəl SKMF-in vəsaiti hesabına güzəştli kredit ayrılmış Binəqədi rayonunda “Elo-Eksklüziv” MMC-nin çörək istehsalı müəssisəsinin fəaliyyətinə baxış keçirilib.

Tədbir çərçivəsində Binəqədi rayonunun, o cümlədən tədbirin keçirildiyi Binəqədi qəsəbəsinin iqtisadi potensialına uyğun olaraq güzəştli kreditlər hesabına maliyyələşdirilməsi məqsədəuyğun hesab olunan müasir quşçuluq kompleksinin, ət kəsimi, kiçik və orta həcmli un məmulatları istehsalı müəssisələrinin yaradılması, müxtəlif çeşidli dekorativ bitkilərin istixana şəraitində yetişdirilməsi üzrə nümunəvi investisiya layihələrinin təqdimatı keçirilmiş, kiçik həcmli investisiya layihələrinin ümumi dəyərinin 100%-dək hissəsinin dövlətin güzəştli kreditləri hesabına maliyyələşdiriləcəyi bildirilmiş, sahibkarlara nümunəvi layihələrin nümunələri, metodiki materiallar paylanıb.

Tədbirdə çıxış edən Binəqədi Rayon İcra Hakimiyyətinin nümayəndəsi Nəsimi Cəfərov Azərbaycan prezidenti İlham Əliyevin Bakı qəsəbələrinin sosial-iqtisadi inkişafına göstərdiyi diqqət və qayğı nəticəsində Binəqədi rayonunda da sahibkarlıq fəaliyyətinin genişləndiyini, yeni istehsal və xidmət müəssisələrinin, sosial infrastruktur obyektlərinin yaradıldığını, əhalinin məşğulluq səviyyəsinin yüksəldiyini qeyd edib.

İİN-in Sahibkarlığın inkişafı siyasəti şöbəsinin müdiri Zaur Qasımov və Regionların inkişafı və dövlət proqramları şöbəsinin müdiri Sahib Məmmədov qeyri-neft sektorunun inkişafının sürətləndirilməsi, əlverişli biznes və investisiya mühitinin formalaşdırılması nəticəsində ölkənin davamlı sosial-iqtisadi inkişafına nail olunduğunu vurğulayıb, Bakı və ətraf qəsəbələrdə həyata keçirilən tədbirlər və görüləcək işlər barədə məlumat veriblər.

SKMF-in icraçı direktoru Şirzad Abdullayev Fond tərəfindən Dövlət Proqramlarında nəzərdə tutulmuş tədbirlərin icrası istiqamətində görülmüş işlər, güzəştli kreditlər hesabına Bakı qəsəbələrində həyata keçirilən layihələr barədə tədbir iştirakçılarına məlumat verib. Bildirilib ki, bu ilin əvvəlindən ötən dövr ərzində Fondun vəsaitləri hesabına sahibkarlıq subyektlərinin 709 investisiya layihəsinin maliyyələşdirilməsinə 66,8 mln. manat, o cümlədən respublikanın regionları üzrə 642 investisiya layihəsinin maliyyələşdirilməsinə 57,9 mln. manat və Bakı qəsəbələri üzrə 67 investisiya layihəsinin maliyyələşdirilməsinə 8,9 mln. manat güzəştli kredit verilib. Bu kreditlər hesabına 3100-dən çox yeni iş yerinin yaradılması nəzərdə tutulur. Qeyd edilib ki, ötən il və bu ilin ötən dövrü ərzində SKMF-in vəsaitləri hesabına Bakı ətrafı kənd və qəsəbələr üzrə 277 investisiya layihəsinin, o cümlədən yeni texnologiyaların tətbiqinə əsaslanan 28 layihənin - faraş tərəvəz məhsulları və dekorativ bitkilər istehsal edən 9 müasir istixana təsərrüfatı, 8 müasir quşçuluq (broyler) təsərrüfatı, 7 müasir çörək istehsalı müəssisəsinin, ət kəsimi və ət emalı müəssisəsinin, yeyinti sənayesi məhsulları istehsalı müəssisəsinin, mebel fabrikinin və metal konstruksiya olan tikinti materialları istehsalı müəssisəsinin yaradılması üzrə investisiya layihələrinin maliyyələşdirilməsinə 43,8 mln. manat güzəştli kredit verilib. Yeni texnologiyaların tətbiqinə əsaslanan layihələrdən 6-sı, o cümlədən 3 müasir istixana təsərrüfatı, 2 müasir çörək istehsalı müəssisəsi və mebel fabriki istifadəyə verilib.

Tədbir çərçivəsində müvəkkil kredit təşkilatları vasitəsilə Bakı qəsəbələrində fəaliyyət göstərən 18 sahibkarlıq subyektinə 3,2 mln. manat güzəştli kredit vəsaiti verilib. Bu kreditlər hesabına 380-dən çox yeni iş yerinin yaradılması nəzərdə tutulur.