Sahibkarlıq

Ana səhifə

Sahibkarlıq

Azərbaycan “Şərq Tərəfdaşlığı” çərçivəsində Kiyevdə keçirilən tədbirlərdə iştirak edib

03 may 2012 13:40 (UTC +04:00)

Bakı - APA-Economics. Ukraynanın Kiyev şəhərində “Şərq Tərəfdaşlığı” Proqramı çərçivəsində növbəti tədbir keçirilib.

“APA-Economics”in xəbərinə görə, tədbirdə Azərbaycan İqtisadi İnkişaf Nazirliyi, Ticarət və Sənaye Palatası, Azərbaycan Sahibkarlar (İşəgötürənlər) Konfederasiyasının, Avropa və “Şərq Tərəfdaşlığı” ölkələrinin rəsmiləri və qeyri-hökumət təşkilatlarının əməkdaşları iştirak ediblər.

Avropa Birliyi tərəfindən maliyyələşdirilən proqramın İkinci İcraçı Komitəsi “Biznes məsləhət xidməti (BAS) və sahibkarlığın inkişafı proqramının (EGP) Şərq Tərəfdaşlığı ölkələrində tətbiqi” üzrə görüş keçirib. Görüş icraçı komitənin üzvləri, “Şərq Tərəfdaşlığı” ölkələrində Avropa Birliyinin sahibkarlığın inkişafı proqramı (EGP) və Biznes məsləhət xidməti (BAS) proqramı tərəfindən təşkil olunub.

İqtisadi Əməkdaşlıq və İnkişaf Təşkilatının (İƏİT) regional seminarı çərçivəsində “Şərq Tərəfdaşlığı” ölkələrində kiçik və orta sahibkarlıq siyasətinin indikatorlar üzrə qiymətləndirilməsi barədə müzakirələr olub.

Eyni zamanda Avropa Palataları Assosiasiyasının (EUROCHAMBRES) təşkil etdiyi “East İnvest” Şərq Tərəfdaşlığı layihəsinin illik konfransı keçirilib. ASK-nın Beynəlxalq əlaqələr və biznesin inkişafı şöbəsinin müdiri Elnur Ələkbərovun iştirak etdiyi tədbiri açıq elan edən palatanın Beynəlxalq əlaqələr üzrə direktoru Dirk Vantquen görülən işlər və gələcək strategiya barəsində danışıb. Konfransda ASK adından Azərbaycanda investisiya mühiti və “East Invest” layihəsinin Azərbaycana faydası barədə təqdimat nümayiş etdirilib. Bundan başqa, “Şərq Tərəfdaşlığı” ölkələrinin nümayəndələrinin təqdimatları dinlənilib və mövzu ətrafında müzakirələr aparılıb, layihə üzrə tərəfdaşlar arasında görüşlər keçirilib.

Qeyd edək ki, “Şərq Tərəfdaşlığı”nın təşəbbüsü ilə Şərq regionunda iqtisadiyyatın inkişafına və ticarətinə kömək məqsədilə fəaliyyətə başlayan “East-İnvest” investisiya layihəsi Avropa Birliyi tərəfindən maliyyələşdirilir. 8 750 min avro büdcəyə malik layihə 2010-cu ilin noyabr ayından 2013-cü ilin oktyabr ayına qədər davam edəcək.