Sahibkarlıq

Ana səhifə

Sahibkarlıq

Dubay Ticarət və Sənaye Palatası Azərbaycanda nümayəndəlik açacaq

24 may 2012 14:49 (UTC +04:00)

Bakı. Nicat Mustafayev - APA-Economics. Bu gün Azərbaycanda səfərdə olan Birləşmiş Ərəb Əmirliklərinin iqtisadiyyat nazirinin müavini Məhəmməd bin Abdul Əziz əl-Şehhinin rəhbərlik etdiyi nümayəndə heyəti Azərbaycanın iqtisadi inkişaf naziri Şahin Mustafayevlə görüşüb.

İqtisadi İnkişaf Nazirliyindən «APA-Economics»ə verilən məlumata görə, görüşdə mövcud iqtisadi əlaqələr və qarşılıqlı investisiya imkanları müzakirə edilib.

Ölkəsində Azərbaycanla əməkdaşlığa xüsusi önəm verildiyini vurğulayan Məhəmməd bin Abdul Əziz əl-Şehhi Azərbaycanda Dubay Ticarət və Sənaye Palatasının nümayəndəliyinin yaradılacağını və bu nümayəndəliyin MDB ölkələri ilə əməkdaşlıq üzrə baş ofis funksiyasını həyata keçirəcəyini bildirib: «Dubay Ticarət və Sənaye Palatası Birləşmiş Ərəb Əmirliklərinin Ticarət və Sənaye Palataları Federasiyasına daxil olan ən böyük Ticarət Palatasıdır».

Öz növbəsində Dubay Ticarət və Sənaye Palatasının baş direktoru Hamad Buamin təmsil etdiyi qurum barədə məlumat verərək, 133 min üzvü olan palatanın dünyanın 100-dən artıq ölkəsində fəaliyyət göstərdiyini qeyd edib. H.Buamin Dubay Ticarət və Sənaye Palatasının Nümayəndəliyinin Azərbaycanda yaradılmasında əsas səbəb kimi iki ölkə arasında yüksək səviyyəli münasibətlərin formalaşması, eləcə də Azərbaycanda siyasi və makroiqtisadi sabitlik, davamlı iqtisadi inkişaf, əlverişli biznes və investisiya mühiti olduğunu diqqətə çatdırıb. H.Buamin regionun lider dövləti olan Azərbaycanın Körfəz ölkələri ilə MDB arasında körpü rolunu oynayacağına əminliyini vurğulayıb.

Görüşdə Ş.Mustafayev Azərbaycanın dünyada nüfuzunun artdığını, etibarlı tərəfdaş kimi tanındığını, ölkədə möhkəm siyasi və makroiqtisadi sabitliyin, davamlı və dayanıqlı iqtisadi inkişafın təmin olunduğunu, əlverişli biznes və investisiya mühitinin yaradıldığını vurğulayıb. Nazir Dubay Ticarət və Sənaye Palatasının Azərbaycanda nümayəndəliyinin yaradılmasının ikitərəfli iqtisadi əməkdaşlığın inkişafı və ticarət dövriyyəsinin artırılması istiqamətində imkanları daha da genişləndirəcəyini qeyd edib.

Azərbaycana səfəri çərçivəsində Birləşmiş Ərəb Əmirliklərinin iqtisadiyyat nazirinin müavini Məhəmməd bin Abdul Əziz əl Şehhinin başçılıq etdiyi nümayəndə heyəti ilə bir sıra dövlət qurumlarında görüşlər keçirəcək.

Azərbaycanda İxracın və İnvestisiyaların Təşviqi Fondunun (Azpromo) və Azərbaycan İnvestisiya Şirkətinin nümayəndələri ilə keçirilmiş görüşdə Azərbaycanın investisiya imkanları təqdim edilib.