Sahibkarlıq

Ana səhifə

Sahibkarlıq

Vergidən yayınan 3 sahibkar azadlıqdan məhrum edilib

02 iyul 2012 10:12 (UTC +04:00)

Bakı. Əli Əhmədov – APA-Economics. Azərbaycan Vergilər Nazirliyi bir neçə iri məbləğdə vergidən yayınma faktlarının aşkarlandığı və bununla bağlı görülən tədbirlər barədə məlumat yayıb. Nazirlikdən «APA-Economics»ə verilən məlumata görə, Vergi Cinayətlərinin İbtidai Araşdırılması Departamenti tərəfindən aparılan araşdırma zamanı Lənkəranda qeydiyyatda olan Seymur Cahangirovun təsisçisi və direktoru olduğu «Fəhmin» müəssisəsinin 2006-2009-cu illərdə 127,023 min manat məbləğində vergilərin dövlət büdcəsindən yayındırılması faktı aşkar olunub, 2010-cu ilin iyun ayında Departamentin istintaq şöbəsində Cinayət Məcəlləsinin 213.2.2-ci maddəsi ilə cinayət işi başlanıb.

İstintaq zamanı müəyyən edilib ki, S.Cahangirov nəinki «Fəhmin», eləcə də müxtəlif vaxtlarda «Sanqeyt», «Nuray-S», «Rasa-Tikinti», «Fəza», «Oskar-M», «Cahan Ltd.» müəssisələrinin adından təqdim etdiyi vergi bəyannamələrinə bilərəkdən təhrif edilmiş məlumatlar daxil etmək və ya bəyannamə təqdim etməmək yolu ilə 3 287,562 min manat məbləğində vergiləri dövlət büdcəsindən yayındırıb. Bundan başqa o, «Sanqeyt», «Rasa-Tikinti» və «Relax-Tikinti MTK» müəssisələri adından qanunsuz sahibkarlıq fəaliyyəti ilə məşğul olaraq tütün və yanacaq məhsullarının satışını xüsusi razılıq (lisenziya) almadan həyata keçirib və 482,106 min manat gəlir əldə edib.

İstintaq materialları toplanmış dəlillərlə sübuta yetirildiyi üçün 18 yanvar 2011-ci il tarixdə S.Cahangirova Cinayət Məcəlləsinin 192.2.2 və 213.2.2-ci maddələri ilə ittiham elan edilib və o, həbs olunub. Məhkəmənin hökmü ilə S.Cahangirov 3 il ərzində dövlət və özünüidarəetmə orqanlarında maddi-məsul vəzifə tutma hüququndan və 7 il müddətinə azadlıqdan məhrum edilib.

«Faiq-İnşaat B.İ.» müəssisəsinin külli miqdarda vergilərin dövlət büdcəsindən yayındırılması faktı üzrə 27 sentyabr 2010-cu il tarixdə başlamış cinayət işinin istintaqı zamanı müəyyən edilib ki, 1973-cü il təvəllüdlü, Ağcabədi rayonunun Qaravəlli kənd sakini Mehman Əmiraslanov həmkəndlisi Müşfiq Sarıyev ilə əlbir olaraq 2 saylı Ərazi Vergilər İdarəsində vergi ödəyicisi kimi qeydiyyatda olan «Səda-Tikinti-M» müəssisəsinə rəhbərlik edərkən müxtəlif vaxtlarda vergi orqanına təqdim olunmuş bəyannamələrə qəsdən təhrif edilmiş məlumatlar daxil edərək 3 911,461 min manat, Bakı şəhəri Vergilər Departamentində vergi ödəyicisi kimi qeydiyyatda olan «Texnoqrupkom» müəssisəsinin direktoru olarkən 2010-cu ilin may ayı üzrə 135,854 min manat məbləğində ƏDV-ni, 8 saylı ƏVİ-də qeydiyyatda olan «Yeni Standart» şirkətinin, «Efiopiya», «İnşaat-Servis», «Səda-12» müəssisəsinin direktorları olarkən 1 301,325 min manat məbləğində vergiləri dövlət büdcəsinə ödəməkdən yayınıb, qanunsuz sahibkarlıq fəaliyyəti ilə məşğul olaraq neft məhsullarının satışı ilə xüsusi razılıq (lisenziya) almadan məşğul olaraq ümumilikdə 232,023 min manat məbləğində xalis gəlir əldə edib.

M.Sarıyev Əmiraslanovla birlikdə törətdikləri yuxarıda qeyd olunan cinayət əməllərindən başqa, özü ayrılıqda 12 saylı ƏVİ-də qeydiyyatda olan «Faiq-İnşaat B.İ.» MMC-yə faktiki rəhbərlik edərkən vergi tutulan dövriyyəni azaltmaqla, ümumilikdə 89,131 min manat məbləğində, 11 saylı ƏVİ-də qeydiyyatda olan «AFA Təmir-Tikinti» MMC-nin rəhbəri olduğu müddətdə 44,974 min manat məbləğində vergiləri dövlət büdcəsindən yayındırıb.

M.Ə.Əmiraslanovun və M.Ə.Sarıyevin sadalanan cinayət əməlləri şahid ifadələri və ekspertiza rəyi ilə sübuta yetirilib, Xətai rayon Məhkəməsinin 17 avqust 2011-ci il tarixli hökmü ilə M.Sariyev 2 il 4 ay 14 gün dövlət və yerli özünü idarəetmə orqanlarında maddi-məsul vəzifə tutma hüququndan və 5 il müddətinə azadlıqdan, M.Əmiraslsnov isə 5 il müddətinə azadlıqdan məhrum edilib.