Sahibkarlıq

Ana səhifə

Sahibkarlıq

Bakıda Azərbaycan-Argentina biznes forumu keçirilib - FOTOSESSİYA

Bakıda Azərbaycan-Argentina biznes forumu keçirilib - <font color=red>FOTOSESSİYA</font>

03 iyul 2012 11:53 (UTC +04:00)

Bakı. Əli Əhmədov – APA-Economics. Bu gün Bakıda İqtisadi İnkişaf Nazirliyinin, Azərbaycanda İxracın və İnvestisiyaların Təşviqi Fondunun (“Azpromo”), Argentinanın Azərbaycandakı səfirliyinin təşkilatçılığı ilə Azərbaycan-Argentina biznes forumu keçirilib.

«APA-Economics»in məlumatına görə, tədbirdə Argentina tərəfindən rəsmi şəxslərlə yanaşı, kənd təsərrüfatı, ərzaq, şərabçılıq, aqrokimya, neft, sənaye, İKT, inşaat, əczaçılıq, tekstil, xidmət və s. sahələrdə fəaliyyət göstərən 300-ə yaxın iş adamı iştirak edib. Azərbaycan tərəfi isə biznes-forumda rəsmi şəxslər və analoji sahələrdə fəaliyyət göstərən sahibkarlarla təmsil olunub.

Tədbirdə çıxış edən iqtisadi inkişaf naziri Şahin Mustafayev Azərbaycanın qazandığı sosial-iqtisadi nailiyyətlər, yaradılmış əlverişli biznes və investisiya mühiti barədə məlumat verib: «Bu gün Azərbaycan xarici investisiyalar üçün cəlbedici və əlverişli ölkə olmaqla yanaşı, həm də investisiya ixracatçısıdır». Onun sözlərinə görə, hələlik Azərbaycanla Argentina arasında iqtisadi sahədə əməkdaşlıq üçün geniş hüquqi-normativ baza yoxdur, amma bu sahədə işlərə artıq başlanıb: «Bu sahədə ciddi iş aparılır. Hazırda ticarət-iqtisadi sahədə əməkdaşlıq və qarşılıqlı investisiyaların həvəsləndirilməsi barədə hökumətlərarası müqavilələr razılaşdırılır. İqtisadi əməkdaşlığın genişləndirilməsi üçün birgə işçi qrupun yaradılması da nəzərdə tutulur».

Nazir biznes-forumda müzakirə edilən məsələlərin və iş adamları arasında ikitərəfli görüşlərin ölkələrimiz arasında ticarət-iqtisadi əlaqələrinin daha da genişlənməsində əhəmiyyətini vurğulayaraq, iş adamlarını hər iki ölkədə birgə layihələr həyata keçirməyə dəvət edib. Onun sözlərinə görə, iki ölkə arasında turizm, sənaye, kənd təsərrüfatı, informasiya texnologiyaları sahəsində ciddi əməkdaşlıq mümkündür.

Argentinanın xarici işlər naziri Hektor Timerman və daxili ticarət üzrə dövlət katibi Giyermo Moreno çıxışlarında geniş tərkibli Argentina ticarət missiyasının Azərbaycana səfərinin məqsədi barədə məlumat verib, argentinalı iş adamlarını Azərbaycanda yaradılmış biznes və investisiya mühitindən yararlanmaqla azərbaycanlı tərəfdaşları ilə əlaqələrin genişləndirilməsinin əhəmiyyətini vurğulayıblar. «Məqsədimiz Azərbaycanda təkcə mal satmaq yox, həm də investisiya yatıraraq bizneslə məşğul olmaqdır» - deyə Giyermo Moreno bildirib.

“Azpromo”nun vitse-prezidenti Gülşən Rzayeva təqdimatla çıxış edərək qurumun fəaliyyəti, ölkəmizdə yaradılmış əlverişli biznes mühiti və investisiya imkanları haqqında məlumat verib. Biznes-forum çərçivəsində Argentina tərəfindən ölkə təqdimatı keçirilib və tədbir iştirakçıları Argentina şirkətlərinin biznes forumda nümayiş olunan malları ilə tanış olublar.

Biznes-forum iş adamları arasında ikitərəfli görüşlərlə davam edib. Sabah - iyulun 4-də isə iş adamları arasında iqtisadiyyatın müxtəlif sektorları üzrə görüşlər keçiriləcək.