Sahibkarlıq

Ana səhifə

Sahibkarlıq

Şimal bölgəsində sahibkarlara 1,1 mln. manatlıq güzəştli kreditlər verilib - FOTO

Şimal bölgəsində sahibkarlara 1,1 mln. manatlıq güzəştli kreditlər verilib - <font color=red>FOTO</font>

06 iyul 2012 10:54 (UTC +04:00)

Bakı. Elnur Hüseynquluyev - APA-Economics. Azərbaycanın İqtisadi İnkişaf Nazirliyinin Sahibkarlığa Kömək Milli Fondu (SKMF) Xaçmazın Yergüc kəndində «Sahibkarlığın inkişafına dövlət dəstəyi» mövzusunda tədbir keçirib.

Nazirlikdən «APA-Economics»ə verilən məlumata görə, tədbirdə Xaçmaz və ətraf rayonlarda fəaliyyət göstərən 100-dək sahibkar iştirak edib.

Tədbirdən əvvəl əsas hissəsi SKMF-in vəsaitləri hesabına Xaçmaz rayonunun Müqtədir qəsəbəsində inşa olunmuş «Bərəkət-İ» MMC-nin müasir soyuducu anbar kompleksinin fəaliyyətinə, Yergüc kəndində «EMA» MMC-nin müasir soyuducu anbar kompleksində və Qaraçı kəndində «Nabran Quşçuluq» MMC-nin müasir quşçuluq (broyler) təsərrüfatında aparılan tikinti işlərinə baxış keçirilib.

Sonra tədbirdə Xaçmaz rayonunun, o cümlədən Yergüc kəndinin iqtisadi potensialına uyğun olaraq güzəştli kreditlər hesabına maliyyələşdirilməsi məqsədəuyğun hesab olunan müasir meyvə-tərəvəz emalı və çörək zavodlarının, ət kəsimi müəssisəsinin, intensiv bağçılıq təsərrüfatlarının, kiçik və orta həcmli istixanaların yaradılması üzrə nümunəvi investisiya layihələrinin təqdimatı keçirilib, kiçik həcmli investisiya layihələrinin ümumi dəyərinin 100%-dək hissəsinin dövlətin güzəştli kreditləri hesabına maliyyələşdiriləcəyi bildirilib, sahibkarlara nümunəvi layihələr və metodiki materiallar paylanılıb.

SKMF-in icraçı direktoru Şirzad Abdullayev çıxışında bildirib ki, bu ilin əvvəlindən ötən dövr ərzində Fondun vəsaitləri hesabına ölkə üzrə sahibkarlıq subyektlərinin 1328 investisiya layihəsinin maliyyələşdirilməsinə 114,1 mln. manat güzəştli kredit verilib. Bu kreditlər hesabına 5400-dən çox yeni iş yerinin yaradılması nəzərdə tutulub. Qeyd edilib ki, meyvə-tərəvəz istehsalı üzrə ixtisaslaşmış rayonlardan olan Xaçmazda son illər SKMF-in güzəştli kreditləri hesabına intensiv bağçılıq təsərrüfatları, soyuducu anbar kompleksləri və meyvə-tərəvəz emalı müəssisələri yaradılıb. Fondun vəsaitləri hesabına Xaçmaz rayonunda yeni texnologiyaların tətbiqinə əsaslan tutumu 11 min ton olan 5 soyuducu anbar kompleksinin inşasına 8,3 mln. manat, 2 meyvə-tərəvəz emalı zavodunun inşasına 3,3 mln. manat güzəştli kredit verilib. Maliyyələşdirilmiş soyuducu anbarlardan 3-ü, meyvə-tərəvəz emalı zavodlarından 1-i istifadəyə verilib, qalan 2 soyuducu anbarın və 1 meyvə-tərəvəz emalı zavodunun isə bu il istifadəyə verilməsi planlaşdırılır. Bununla yanaşı, Quba-Xaçmaz iqtisadi rayonunun meyvə-tərəvəz istehsalı sahəsində potensialı nəzərə alınaraq istehsal sahələrinin genişləndirilməsinin və yeni emal müəssisələrinin yaradılmasının güzəştli qaydada maliyyələşdirilməsinə diqqətin daha da artırılacağı vurğulanıb, bu sahədə sahibkarların fəallığının artırılması tövsiyə olunub.

Tədbir çərçivəsində müvəkkil kredit təşkilatları vasitəsilə Xaçmaz və ətraf rayonlarda fəaliyyət göstərən 53 sahibkarlıq subyektinə 1,1 mln. manatadək güzəştli kredit verilib. Bu layihələrin reallaşması 90-dək yeni iş yerinin yaradılmasına imkan verir.