Sahibkarlıq

Ana səhifə

Sahibkarlıq

“Azərbaycanın İxrac Kataloqu - 2012” layihəsinin təqdimat mərasimi keçirilib

06 iyul 2012 16:22 (UTC +04:00)

Bakı. Elnur Hüseynquluyev - APA-Economics. Bu gün Bakıda Azərbaycan Marketinq Cəmiyyətinin (AMC) Xarici İşlər Nazirliyinin (XİN) maliyyə dəstəyi ilə reallaşdırdığı “Azərbaycanın İxrac Kataloqu - 2012” layihəsinin təqdimat mərasimi keçirilib.

«APA-Economics»in məlumatına görə, tədbirdə millət vəkilləri, iş adamları, müəssisə və təşkilat rəhbərlərinin iştirak edib.

Tədbirdə çıxış edən AMC sədri Bəhruz Hüseynov bildirib ki, ölkə iqtisadiyyatının qeyri-neft sektorunun inkişafı üçün ixrac kataloqunun nəşri böyük əhəmiyyət kəsb edir: “Bu, artıq IV nəşrdir və layihə bir neçə ildir uğurla həyata keçirilir. AMC tərəfindən ilk kataloq ABŞ-ın Azərbaycandakı səfirliyinin qrant layihəsi hesabına həyata keçirilib. Qrant layihələri tez başa çatdığına görə layihələr davamlı olmurdu. Hazırda isə layihə XİN-in dəstəyi ilə mütəmadi həyata keçirilir. Builki kataloq kitab formasında 3 min nüsxə ilə ingilis dilində, elektron disk formatında isə 5 dildə (ingilis, alman, rus, ispan və ərəb dillərində) hazırlanıb. Bu ixrac kataloqu hissə-hissə XİN-ə təqdim olunacaq, Azərbaycanın xaricdəki səfirlikləri və diplomatik nümayəndəlikləri, Azərbaycanın ictimai və dövlət təşkilatları, transmilli şirkətlər və beynəlxalq təşkilatların ölkədəki nümayəndəlikləri vasitəsilə yayılacaq, beynəlxalq sərgi və konfranslarda təqdim olunacaq. Bu kataloq şirkətlərin xarici potensial müştəri və partnyorlarla yeni əlaqələr qurması, təqdim etdiyi məhsul və xidmətlərin yeni bazarlar tapması üçün geniş imkanlar yaradacaq”.

Prezident Administrasiyası ictimai-siyasi məsələlər şöbəsinin müdir müavini Tahir Süleymanov indiyədək Azərbaycanda 2700-dən çox QHT-nin qeydiyyatdan keçdiyini, onların müxtəlif sahələrdə, o cümlədən hüquq, antikorrupsiya, antinarkomaniya, elm, təhsil sahələrində ixtisaslaşdığını vurğulayıb: “Hazırda Azərbaycandan 200-dən çox məhsul ixrac edilir, ixrac idxalı 2 dəfə üstələyir, ixracda qeyri-neft sektorunun payı durmadan artır. Kataloq Azərbaycanın ixrac potensialının inkişafına təkan verəcək”.