Sahibkarlıq

Ana səhifə

Sahibkarlıq

Tacikistan prezidenti “Azersun Holding”i ölkəsində fəaliyyət göstərməyə dəvət edib - FOTO

Tacikistan prezidenti “Azersun Holding”i ölkəsində fəaliyyət göstərməyə dəvət edib - <font color=red>FOTO</font>

13 iyul 2012 10:51 (UTC +04:00)

Bakı – APA-Economics. Azərbaycanda rəsmi səfərdə olan Tacikistan prezidenti Emoməli Rəhmon Bakının Xəzər rayonunun Binə qəsəbəsində yerləşən “Azersun Holding”ə məxsus “Green Tech” MMC-nin müasir istixana kompleksi ilə yaxından tanış olub.

Holdinqdən “APA-Economics”ə verilən məlumata görə, “Azersun Holding”in İdarə Heyətinin sədri Abdolbari Goozal komplekslə yaxından tanış olan Tacikistan prezidentinə məlumat verərək bildirib ki, prezident İlham Əliyevin ölkəmizdə kənd təsərrüfatına göstərdiyi diqqət və qayğı, həmçinin sahibkarlar üçün əlverişli şəraitin yaradılması nəticəsində bir sıra layihələr həyata keçirilir. Binə qəsəbəsində yerləşən və 80 hektar ərazini əhatə edən “Green Tech” MMC-nin müasir istixana kompleksi də bu layihələrdən biridir.

Müəssisənin rəhbəri Tahir Goozal qeyd edib ki, MMC-nin əsas məqsədi ölkədə müasir istixana kompleksi yaratmaq, əhalini keyfiyyətli tərəvəz məhsulları ilə təmin etməkdir. Müəssisədə inşaat və yeni investisiya layihələrinin reallaşdırılması davam edir və ümumilikdə obyektə 16 mln. manat sərmayə qoyuluşu nəzərdə tutulub. İstixana kompleksinin inşasında ölkəmizdə ən son dünya təcrübəsinə əsaslanan inşaat materialları, avadanlıq, cihaz və qurğulardan istifadə edilib, müasir texnologiya tətbiq olunub. T.Goozal hazırda müəssisədə 151 nəfərin işlədiyini, kompleks tam istifadəyə verildikdən sonra isə 300 nəfərin işlə təmin olunacağını qeyd edib. Onun sözlərinə görə, hazırda müəssisənin illik istehsal gücü 6 min tondur. Gələcəkdə isə bu rəqəmin 10 min tona çatdırılacağı planlaşdırılır.

İstehsal prosesi ilə yaxından tanış olan Tacikistan prezidenti yetişdirilən məhsulların dadına baxıb və razılığını bildirib. Daha sonra isə Emoməli Rəhmon “Azersun Holding”i Tacikistanda fəaliyyət göstərməyə dəvət edərək, holdinqə torpaq sahəsi ayrılacağını, tələb olunan bütün güzəştləri yaradacağını bildirib.