Sahibkarlıq

Ana səhifə

Sahibkarlıq

İlk yarımildə 350-yə yaxın kiçik müəssisə özəlləşdirilib

17 iyul 2012 09:25 (UTC +04:00)

Bakı. Əli Əhmədov -APA-Economics. Bu ilin yanvar-iyun aylarında ümumilikdə respublika üzrə kiçik özəlləşdirmə formasında 350-yə yaxın müəssisə və obyekt, eləcə də 250-yə yaxın obyektin yerləşdiyi torpaq sahəsi özəlləşdirilib.

«APA-Economics»in məlumatına görə, bu barədə Əmlak Məsələləri Dövlət Komitəsində (ƏMDK) 2012-ci ilin birinci yarısında həyata keçirilən işlər və qarşıda duran vəzifələrə həsr olunmuş iclasda bildirilib.

Qeyd olunub ki, ilk 6 ayda dövlət müəssisələrinin çevrilməsi nəticəsində 5 səhmdar cəmiyyəti yaradılıb. Səhmlərin satışı üzrə keçirilmiş 25 pul və 1 ixtisaslaşdırılmış pul hərracında 20-yə yaxın səhmdar cəmiyyətin səhmləri satılıb.

Hesabat dövründə 1 dövlət müəssisəsinin (“Metallurq” İdman Kompleksi) satışı üzrə investisiya müsabiqəsi keçirilib və qalib müəyyən edilib. Cari ilin altı ayı ərzində investisiya müsabiqəsi vasitəsilə özəlləşdirilmiş 2 müəssisə üzərində mülkiyyət hüququ alıcılara keçib.

İnvestisiya müsabiqəsi vasitəsilə özəlləşdirilmiş müəssisələrə 2012-ci ilin yanvar-iyun aylarında müqavilələr üzrə alıcılar tərəfindən 70 mln. manat məbləğində investisiya qoyulub, 300-ə yaxın yeni iş yeri yaradılıb.

Özəlləşdirilən müəssisələrdə institusional yeniləşmə sahəsində əvvəlki dövrlərdə görülmüş işlərin təhlili aparılıb, hazırlanmış materiallar və normativ hüquqi sənədlər təhlil edilib və onların təkmilləşdirilməsi məqsədilə müvafiq işlər davam etdirilib.

Bu ilin birinci yarısında nizamnamə kapitalında dövlət payı olan səhmdar cəmiyyətlərindən 267 balans hesabatı və 297 inventarizasiya aktı qəbul edilib. Komitənin sərəncamında olan dövlət müəssisələrindən isə 78 balans hesabatı və 92 inventarizasiya aktı qəbul edilib. Komitəyə 5846 dövlət müəssisə və təşkilatları tərəfindən 2011-ci ilin yekununa görə «Dövlət əmlakının qorunub saxlanılması və ondan istifadə vəziyyəti haqqında illik xüsusi hesabat forması» daxil olub, bunlardan 4180-i təhlil edilib.

İclasda qeyd edilib ki, qlobal iqtisadi böhran dövründə fəaliyyəti dayanmış Gəncə Gil-Torpaq istehsalat sahəsi görülmüş tədbirlər nəticəsində yenidən işə başlayıb, hazırda müəssisədə 1200 nəfərə yaxın işçi çalışır.

Gəncə şəhərində bölgədə və respublikada iqtisadi və sosial baxımdan mühüm əhəmiyyət daşıyan müasir Alüminium Sənayesi Kompleksi yaradılmış və istifadəyə verilmişdir. Ən müasir texnologiyalar və avadanlıqlar əsasında qurulmuş bu müəssisədə 600 yeni iş yeri yaradılıb. Hazırda ilkin alüminiumdan yarımfabrikat məhsullarını istehsal edəcək emal sənayesi müəssislərinin yaradılması istiqamətində tədbirlər davam etdirilir. Bunun nəticəsində əlavə 300 iş yerinin açılması təmin olunacaq.