Sahibkarlıq

Ana səhifə

Sahibkarlıq

Sudan qeyri-qanuni istifadə edənlər cərimələnir

30 iyul 2012 14:05 (UTC +04:00)

Bakı. Əli Əhmədov - APA-Economics. “Azərsu” ASC içməli suyun dəqiq uçotunun aparılması və sudan qeyri-qanuni istifadə hallarının aradan qaldırılması istiqamətində nəzarət tədbirlərini davam etdirir.

“Azərsu” ASC-nin mətbuat xidməti və ictimaiyyətlə əlaqələr şöbəsindən «APA-Economics»ə bildirilib ki, bu sahədə nəzarət tədbirləri gücləndirilsə də, hələ də bəzi abunəçilər içməli sudan sayğacdankənar və müqavilə bağlamadan istifadə edirlər.

“Baki Sukanal” idarəsinin Xətai Sukanal departamenti əməkdaşlarının keçirdiyi nəzarət tədbirləri nəticəsində Bakı şəhəri Xətai rayonu Mingəçevir küçəsi, 40 ünvanında yerləşən “Avto-qarant” ASC-də içməli sudan qeyri-qanuni istifadə faktı aşkarlanıb. Səhmdar Cəmiyyətin yerləşdiyi ərazidə icarə əsasında fəaliyyət göstərən xalçayuma, daş kəsimi, mebel və şüşə sexlərində içməli sudan qeyri-qanuni istifadə edilib. Su təchizatı sisteminə baxış keçirilərkən məlum olub ki, həmin obyektlərə içməli suyun verilməsi 25 mm diametrli borularla nəzərdə tutulsa da, qeyri-qanuni çəkilmiş 25 mm diametrli xətdən istifadə edilib.

Araşdırma zamanı məlum olub ki, obyekt ərazisindəki 2 subartezian quyusundan çıxarılan sular istifadə olunduqdan sonra kanalizasiya şəbəkəsinə axıdılıb və kanalizasiya xidmətlərindən qeyri-qanuni istifadə edilib.

«Aşkarlanan faktlar obyekt rəhbərliyinin iştirakı ilə aktlaşdırılıb və obyektin su təchizatı dayandırılıb. Sudan qeyri-qanuni istifadə edilməsinə görə “Azərsu” ASC-yə dəymiş zərər qiymətləndiriləcək və abunəçi - “Avto-qarant” ASC cərimə olunacaq» - deyə məlumatda bildirilir.

“Azərsu” bir daha abunəçilərin diqqətinə çatdırır ki, içməli sudan qeyri-qanuni istifadə yolverilməzdir. Belə halların aşkarlanması üçün nəzarət tədbirləri mütəmadi davam etdiriləcək, qanunsuz hərəkətlərə yol verən abunəçilərin içməli su təchizatı qeyd-şərtsiz dayandırılacaq və onlara qarşı cərimə tətbiq ediləcək.