Sahibkarlıq

Ana səhifə

Sahibkarlıq

Standartlara uyğun sement buraxmadığına görə «Qaradağ Tikinti Materialları» ASC ilə bağlı materiallar prokurorluğa göndərilib

06 avqust 2012 15:30 (UTC +04:00)

Bakı – APA-Economics. Standartlaşdırma, Metrologiya və Patent üzrə Dövlət Komitəsi yanında Texniki Tənzimləmə və Standartlaşdırma üzrə Dövlət Nəzarəti Xidməti istehlak bazarında satılan sementlərin normativ sənədlərin tələblərinə uyğunluğunu araşdırıb.

Komitədən «APA-Economics»ə verilən məlumata görə, bu məqsədlə Bakı şəhəri, Dərnəgül şossesi, 1968-cu məhəllədə yerləşən 3 nömrəli mağazadan «Qaradağ Tikinti Materialları» ASC tərəfindən istehsal olunan və üzərində «Qaradağ-BQZ» əmtəə nişanı göstərilən 20 kisə sement nəzarət alışı qaydasında götürülüb, kisələr tərəzi vasitəsi ilə çəkilib və heç birinin çəkisi standartların tələblərinə uyğun gəlməyib.

Üzərində çəkisi 40±1 kq göstərildiyi halda onların faktiki çəkisi 29,7 kiloqramdan 36,4 kiloqrama qədər təşkil edib. Normativ sənədlərin tələblərinə əsasən 20 kisənin orta çəkisi 40-0,2 kiloqramdan 40+0,5 kiloqrama qədər olduğu halda, 20 kisənin orta çəkisi faktiki olaraq 31,9 kq təşkil edib. Beləliklə istehlakçılar hər sement kisəsini alarkən «Qaradağ Tikinti Materialları» ASC tərəfindən təxminən 30% qədər miqdarda aldadılıb.

Bundan başqa, müəssisədə istehsal olunan sementin əsas keyfiyyət göstəriciləri də normativ sənədlərin tələblərinə cavab verməyib. Belə ki, normativ sənədlərin tələblərinə əsasən sementin əyilmədə möhkəmlik həddi 5,4 Mpa-dan az olmamalı olduğu halda faktiki 3,7 MPa, sıxılmada 39,2 Mpa-dan az olmamalı olduğu halda faktiki 18,2 MPa təşkil edib. Aşkar olunmuş qanun pozuntularına hüquqi qiymət verilməsi üçün toplanmış materiallar Azərbaycan Respublikasının Baş Prokurorluğuna göndərilib.