Sahibkarlıq

Ana səhifə

Sahibkarlıq

Azərbaycan paytaxtında üç qeyri-yaşayış sahəsinin icarəsi ilə bağlı keçirilən investisiya müsabiqələrinə yekun vurulub

27 avqust 2012 08:49 (UTC +04:00)

Bakı. Vahab Rzayev – APA-Economics. Azərbaycan Əmlak Məsələləri Dövlət Komitəsi bir sıra qeyri-yaşayış sahələrinin icarəyə verilməsi üzrə keçirdiyi investisiya müsabiqələrinin nəticələrini açıqlayıb. Komitədən «APA-Economics»ə verilən məlumata görə, Bakı şəhəri, Xətai rayonu, Y.Səfərov küçəsi,17, Yasamal rayonu, Şərifzadə küçəsi,75 və Nizami rayonu, Ş.Mirzəyev küçəsi,23 ünvanında yerləşən ümumi sahələri müvafiq olaraq 285,1 kv. metr, 17,2 kv. metr və 11,2 kv. metr olan qeyri-yaşayış sahələrinin icarəyə verilməsi ilə bağlı investisiya müsabiqə elan edilib.

Sifarişçilər qarşısında icarəyə verilən obyektin məxsus olduğu müəssisənin spesifik fəaliyyət profilinə uyğun olaraq təyinatı üzrə istifadə edilməsini təmin etmək, icarəyə verilən obyektin ərazisində yerləşdiyi müəssisənin fəaliyyətinə maneçilik yaradılmaması, birgə istifadə olunan kommunikasiya xətlərinə xələl gətirilməməsi, kommunikasiya xətlərindən birgə istifadə edilməsi, icarəyə verilən obyektin xarici görünüşünün və memarlıq elementlərinin qorunub saxlanılması və dövlət büdcəsinə ödəniləcək icarə haqqına dair təklifin verilməsi kimi şərtlər qoyulub.

Keçirilən hər bir müsabiqə üzrə yaradılmış komissiya müsabiqə iştirakçılarının təqdim etdikləri təkliflərə baxdıqdan sonra açıq səsvermə yolu ilə qərar qəbul edib. Səsvermənin nəticələrinə uyğun olaraq, Xətai rayonunda yerləşən qeyri-yaşayış sahəsinin icarəyə verilməsi ilə bağlı müsabiqənin qalibi «GEN-LAB» MMC elan edilib. Digər müsabiqələrin qalibi isə «Azərtelekom» MMC olub.

Müsabiqənin şərtlərinə müvafiq olaraq, qalib şirkət icarəyə götürəcəyi qeyri-yaşayış sahəsinin qanunvericiliklə müəyyən edilmiş aylıq icarə haqqının dövlət büdcəsinə köçürülməsinin, habelə bağlanılacaq icarə müqaviləsinin şərtlərinin yerinə yetirilməsinin, balans saxlayıcının hesabına köçürüləcək kommunal xərclərinin və digər ödəmələrin vaxtlı-vaxtında köçürülməsinin təmin edilməsini öhdəsinə götürüb.

Eyni zamanda müsabiqə qalibi tərəfindən icarəyə götürülən obyektin məxsus olduğu müəssisənin spesifik fəaliyyət profilinə uyğun olaraq təyinatı üzrə istifadə edilməsi, müəssisənin fəaliyyətinə maneçilik yaradılmaması, eləcədə obyektin xarici görünüşünün və memarlıq elementlərinin qorunub saxlanılması da təmin ediləcək.