Sahibkarlıq

Ana səhifə

Sahibkarlıq

Bakıda istifadə müddəti bitmiş müxtəlif növ qənnadı məhsulların satışı aşkarlanıb

03 sentyabr 2012 12:02 (UTC +04:00)

Bakı. Elnur Hüseynquluyev - APA-Economics. Azərbaycan Standartlaşdırma, Metrologiya və Patent üzrə Dövlət Komitəsi yanında Texniki Tənzimləmə və Standartlaşdırma üzrə Dövlət Nəzarəti Xidməti tərəfindən Bakı şəhəri, Binəqədi rayonu, Balaxanı şosesi ünvanında fəaliyyət göstərən, Rusiya istehsalı olan müxtəlif növ unlu və şəkərli qənnadı məhsulların idxalı və satışını həyata keçirən «Venera» MMC-də yoxlama aparılıb.

Komitədən «APA-Economics»ə verilən məlumata görə, müəssisəyə məxsus anbarda aparılmış araşdırma zamanı müxtəlif ticarət şəbəkələrindən geri qaytarılmış və yararlılıq müddəti bitmiş məhsulların üzərindəki tarixin silinərək yeni tarix qeyd olunduğu aşkar edilib. Eyni zamanda məhsulların üzərindəki etiketlərin qopardılaraq son istifadə müddətinin silinməsi, yeni nüsxəsinə müəssisə tərəfindən tarix vurulub satışa göndərilməsi müəyyən edilib.

«Venera» MMC-yə məxsus anbarda aşkar olunmuş Rusiyanın «Nevski» qənnadı fabrikinin istehsalı olan yararlılıq müddəti bitmiş 276 kq «Mia» konfetləri, yararlılıq müddəti bu il mayın 31-də bitmiş 210 kq «Toffetto» şokoladlı irisi, üzərində istehsal tarixi olmayan 159 kq «Afinskie taynı» adlı konfetləri, üzərində istehsal tarixi olmayan 80 kq «Furintik» marmeladı, Rusiyanın «Penzenskiy xlebzavod» müəssisəsinin istehsalı olan üzərində yararlılıq tarixi olmayan 105 kq «Aromatnoe» adlı şəkərli peçenye, üzərində istehsal tarixi olmayan 90 kq «Vkusnoe» şəkərli peçenye, üzərində istehsal tarixi olmayan 91 kq «Prajskoe» şəkərli peçenye, üzərində istehsal tarixi olmayan 45 kq «Voloqodskoe vanilnoe» peçenye, üzərində istehsal tarixi olmayan 243 kq «Voloqodskoe» şəkərli peçenyeləri Dövlət Nəzarəti Xidməti tərəfindən aktlaşdırılaraq möhürlənmiş və satışı qadağan edilib.

Müəssisədə araşdırmalar davam etdirilir.