Sahibkarlıq

Ana səhifə

Sahibkarlıq

Azərbaycan prezidenti Parisdə MEDEF-in üzvü olan iş adamları ilə görüşüb - FOTO

Azərbaycan prezidenti Parisdə MEDEF-in üzvü olan iş adamları ilə görüşüb - <font color=red>FOTO</font>

19 sentyabr 2012 15:59 (UTC +04:00)

Bakı – APA-Economics. Fransada işgüzar səfərdə olan Azərbaycan prezidenti İlham Əliyev bu gün Parisdə Fransa Sahibkarlar Təşkilatına – MEDEF-ə üzv olan iş adamları ilə görüşüb.

“APA-Economics”in xəbərinə görə, dövlət başçısını “MEDEF International”ın rəhbəri Jan Bürel qarşılayaraq iş adamları ilə görüşə vaxt ayırdığı üçün Azərbaycan prezidentinə təşəkkür edib. Bildirib ki, görüşdə müxtəlif şirkətləri təmsil edən 60-a yaxın iş adamı iştirak edir.

Tədbirdə çıxış edən prezident İlham Əliyev bildirib ki, MEDEF-ə üzv olan iş adamları ilə keçirilən əvvəlki görüşlər Azərbaycanla Fransanın aparıcı şirkətləri arasında iqtisadi sahədə güclü tərəfdaşlıq münasibətlərinin yaranmasına mühüm töhfə verib. Azərbaycan-Fransa iqtisadi əməkdaşlığının sürətlə inkişaf etdiyini deyən dövlət başçısı iki ölkə arasında ticarət dövriyyəsinin artdığını bildirib. İqtisadi əməkdaşlığın gələcəkdə daha da şaxələndiriləcəyini söyləyən prezident İlham Əliyev deyib ki, Fransanın aparıcı “Total” və “GDF-Suez” şirkətləri Azərbaycanın uzunmüddətli tərəfdaşıdır.

Azərbaycanın enerji siyasətinin artıq regionun hüdudlarından kənara çıxdığını vurğulayan prezident qeyd edib ki, hazırda Azərbaycan Avropanın enerji təhlükəsizliyinin təmin edilməsində tərəfdaşları ilə birgə işləyir: “Azərbaycan nəhəng neft-qaz ehtiyatlarına və şaxələndirilmiş boru kəmərləri infrastrukturuna malik ölkədir. Hazırda Azərbaycanın qaz ehtiyatlarını müxtəlif istiqamətlərə ixrac etməyə imkan verəcək yeni boru kəmərlərinin reallaşdırılması üzərində iş gedir. Enerji təminatı marşrutlarının şaxələndirilməsi bizim üçün mühüm əhəmiyyət kəsb edir. Bu sahədə Azərbaycanın maraqları avropalı tərəfdaşların maraqları ilə üst-üstə düşür və bu gün ölkəmiz Avropanın etibarlı tərəfdaşıdır”.

Hazırda Azərbaycanın təsdiq olunmuş qaz ehtiyatlarının 2,5 trln. kubmetrdən çox olduğunu diqqətə çatdıran dövlət başçısı vurğulayıb ki, Azərbaycan Fransa şirkətlərinin də regionun və Avropanın enerji xəritəsini dəyişəcək TANAP layihəsinə cəlb olunmasına tərəfdardır.

Müzakirələrdə iştirak edən MEDEF-ə üzv olan iş adamları Azərbaycanda gedən iqtisadi proseslər, ölkənin Avropanın enerji təhlükəsizliyinin təminatında oynadığı rol, həyata keçirilən layihələr və digər məsələlərlə bağlı suallarla Prezident İlham Əliyevə müraciət ediblər.

Prezident İlham Əliyev Azərbaycanın iqtisadi prioritetləri, qeyri-neft sektoru, respublikamızda çalışan Fransa şirkətlərinin fəaliyyəti, ölkəmizin regionda hazırkı vəziyyəti və gələcək rolu, enerji, nəqliyyat, səhiyyə, turizm, informasiya və kommunikasiya texnologiyaları, gömrük və digər sahələrdə əməkdaşlıq mövzularında suallara ətraflı cavab verib.

Qeyd edək ki, MEDEF Fransanın 800 min şirkətinin birləşdiyi bir qurumdur. Bu quruma müxtəlif sahələrdə çalışan şirkətlər, o cümlədən bank sektoru, sığorta, ərzaq sahələri, təyyarə və avtomobil istehsal edən, mühəndislik, kimya texnologiyaları sahələrində ixtisaslaşan şirkətlər daxildir.