Sahibkarlıq

Ana səhifə

Sahibkarlıq

Azərbaycan hökuməti Rəqabət Məcəlləsinin layihəsinə yenidən baxacaq

24 sentyabr 2012 14:08 (UTC +04:00)

Bu barədə «APA-Economics»ə Milli Məclisin İqtisadi Siyasət Komitəsinin üzvü, millət vəkili Vahid Əhmədov bildirib.

Qeyd edək ki, ölkədə rəqabət mühitinin gücləndirilməsi məqsədi daşıyan Rəqabət Məcəlləsi Milli Məclisdə hələ 2009-cu ildə II oxunuşdan keçib. Sənədin III oxunuşdan keçməsi hələ 2010-cu ilin yaz sessiyasında gözlənilsə də, o vaxtdan bu proses dayanıb.

Bir qədər əvvəl Milli Məclisin İqtisadi Siyasət Komitəsinin sədri Ziyad Səmədzadə bildirib ki, məcəllənin qəbulu 2012-ci ilin sonunadək başa çatacaq: «Mən bu barədə müvafiq qurumlarla, o cümlədən iqtisadi inkişaf naziri Şahin Mustafayevlə danışmışam. Qərara almışıq ki, Milli Məclisin payız sessiyasında məcəllə üzərində müzakirələri gücləndirək və bu il məcəlləni hazırlayıb başa çatdıraq». Artıq Məcəllə parlamentin payız sessiyasının gündəliyinə salınıb.

Bununla yanaşı, bəzi beynəlxalq sahibkarlıq birlikləri, o cümlədən Azərbaycanda 240-dan artıq yerli və xarici iri şirkəti birləşdirən Amerika Ticarət Palatası (AmCham) Rəqabət Məcəlləsinin II oxunuşdan sonrakı variantda qəbuluna etiraz edir.

Palatanın bununla bağlı yaydığı mövqe sənədində bildirilir ki, Rəqabət Məcəlləsinin layihəsi indiki (II oxunuşdan sonrakı) variantda Azərbaycan bazarında rəqabəti nəinki gücləndirməyəcək, əksinə, hətta zəiflədə bilər.

Məcəllənin layihəsinin bütün dünya üzrə qəbul edilmiş qabaqcıl təcrübəyə zidd olduğunu və rəqabətin daha da genişlənməsinə şərait yaratmayacağını bildirən AmCham ekspertləri sənədin təkmilləşdirilməsini təklif edirlər.

Bir sıra ekspert, o cümlədən bəzi millət vəkilləri Məcəllənin indiyədək qəbul olunmamasının səbəbini müxtəlif qrupların buna mane olması, digərləri isə beynəlxalq təşkilatların layihəyə kəskin reaksiyası ilə izah edirlər.

Bununla əlaqədar olaraq Rəqabət Məcəlləsinin III oxunuşda müzakirəsi və qəbulu böyük maraqla gözlənilir. Müzakirə ərəfəsində sənədin layihəsinin yenidən baxılmaq üçün İqtisadi İnkişaf Nazirliyinə göndərilməsi burada dəyişikliklər edilməsi ilə bağlı ehtimallar yaradır. Lakin müşahidəçilər bildirirlər ki, sənədə ciddi dəyişikliyin edilməsi gözlənilmir.