Sahibkarlıq

Ana səhifə

Sahibkarlıq

Bakıda «Təsərrüfat cəmiyyətlərində korporativ idarəetmənin qiymətləndirilməsi üzrə Metodologiya»nın təqdimatı keçirilib

08 oktyabr 2012 13:53 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan İqtisadi İnkişaf Nazirliyi və Beynəlxalq Maliyyə Korporasiyasının (IFC) təşkilatçılığı ilə «Təsərrüfat cəmiyyətlərində korporativ idarəetmənin qiymətləndirilməsi üzrə Metodologiya»nın təqdimatı keçirilib.

«APA-Economics»in məlumatına görə, tədbirdə korporativ idarəetmə sahəsində beynəlxalq ekspertlər, İqtisadi İnkişaf Nazirliyi, aidiyyəti dövlət qurumları, Azərbaycan Sahibkarlar Konfederasiyası, beynəlxalq təşkilatların nümayəndələri və 20-yə yaxın sahibkar iştirak ediblər.

Tədbirdə çıxış edən İqtisadi İnkişaf Nazirliyi korporativ idarəetmə sektorunun müdiri Anar Hacızadə «Təsərrüfat cəmiyyətlərində korporativ idarəetmənin qiymətləndirilməsi üzrə Metodologiya» barədə məlumat verib və qeyd edib ki, Metodologiya Azərbaycan şirkətləri tərəfindən Korporativ Standartların tətbiqinin genişləndirilməsi, korporativ idarəetmə səviyyəsinin qiymətləndirilməsi məqsədilə hazırlanıb. Metodologiyanın hazırlanmasında İqtisadi Əməkdaşlıq və İnkişaf Təşkilatının Korporativ İdarəetmə Prinsipləri və Azərbaycan Korporativ İdarəetmə Standartları əsas götürülüb. Sənəddə aidiyyəti dövlət qurumlarının, IFC-nin, Qlobal Korporativ İdarəetmə Forumunun, ekspertlərin rəy və təklifləri nəzərə alınıb. Sənəd şirkətlərdə Korporativ İdarəetmə Standartlarının tətbiqi səviyyəsinin müəyyənləşdirilməsinə imkan yaradacaq, həmçinin, şirkətlərdə qabaqcıl idarəetmə təcrübəsinin tətbiqi, şirkətlərin fəaliyyətində şəffaflığın və hesabatlılığın artırılmasında əhəmiyyətli olacaq.

Tədbirdə çıxış edən IFC-nin Qlobal Korporativ İdarəetmə Forumunun özəl sektor üzrə məsləhət xidmətləri qrupunun sədr müavini, «DWS Investment» şirkətinin direktoru və Almaniya Korporativ İdarəetmə Komissiyasının üzvü Kristian Strenger qeyd edib ki, sözügedən Metodologiyanın qəbul edilməsi mühüm hadisədir, çünki bu, Azərbaycan şirkətlərinə və onların maraqlı tərəflərinə korporativ idarəetmənin təkmilləşdirilməsi planının hazırlanması üçün bir alət təklif edir. Bu təşəbbüs qabaqcıl idarəetmə sisteminin qurulması üçün korporativ idarəetmə təcrübələrinin təkmilləşdirilməsini başlıca şərt kimi qəbul edən beynəlxalq bazarlar tərəfindən də yaxşı qarşılanacaq.