Sahibkarlıq

Ana səhifə

Sahibkarlıq

Budapeştdə Macarıstan-Azərbaycan biznes forumu keçirilib

09 oktyabr 2012 10:38 (UTC +04:00)

Bakı. Nicat Mustafayev - APA-Economics. Azərbaycan iqtisadi inkişaf naziri Şahin Mustafayevin rəhbərliyi ilə rəsmi şəxslərdən və iş adamlarından ibarət Azərbaycan nümayəndə heyəti Macarıstanda səfərdədir.

İqtisadi İnkişaf Nazirliyindən “APA-Economics”ə verilən məlumata görə, səfər çərçivəsində İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (Azpromo) və Macarıstanın İnvestisiyalar və Ticarət üzrə Agentliyinin (HİTA) təşkilatçılığı ilə Macarıstan-Azərbaycan biznes forumu keçirilib.

Tədbirdə Azərbaycan və Macarıstan tərəfindən rəsmi şəxslərlə yanaşı, kənd təsərrüfatı, səhiyyə, maliyyə, toxuculuq, tikinti, İKT və s. sahələrdə fəaliyyət göstərən 130-a yaxın iş adamı iştirak edib.

Macarıstanın dövlət katibi, Azərbaycan və Macarıstan arasında iqtisadi əməkdaşlıq üzrə birgə komissiyanın həmsədri Peter Siyarto biznes forum, işgüzar görüş və investisiya imkanlarına dair təqdimatların sahibkarlar arasında əməkdaşlığın daha da genişlənməsində, ikitərəfli ticarət əlaqələrinin inkişafında əhəmiyyətli olduğunu vurğulayıb, hər iki ölkənin iqtisadi sahədə böyük potensiala malik olduğunu qeyd edib.

Öz növbəsində Azərbaycanın iqtisadi inkişaf naziri, Azərbaycan və Macarıstan arasında iqtisadi əməkdaşlıq üzrə birgə komissiyanın həmsədri Şahin Mustafayev Azərbaycan və Macarıstan arasında iqtisadi əməkdaşlığın uğurla inkişaf etdiyini, dövlət başçılarının qarşılıqlı rəsmi səfərlərinin, aparılan danışıqların ikitərəfli əlaqələrin genişlənməsində əhəmiyyətini vurğulayıb və bildirib ki, Azərbaycanda Macarıstan kapitallı 4 şirkət fəaliyyət göstərir: «Ötən il iki ölkə arasında ticarət dövriyyəsi 2,6 dəfə artıb. Azərbaycan və Macarıstan arasında iqtisadi sahədə əməkdaşlığın inkişafında hökumətlərarası komissiyanın fəaliyyəti də xüsusi əhəmiyyət kəsb edir».

Hər iki ölkənin işgüzar dairələri arasında əməkdaşlığın daha da inkişafı üçün Azərbaycan və Macarıstan arasında siyasi, hüquqi və iqtisadi zəminin mövcud olduğunu qeyd edən Ş.Mustafayev kənd təsərrüfatı, tikinti, enerji, İKT, turizm, səhiyyə və maliyyə sahəsində əlaqələrin genişləndirilməsi üçün böyük potensialın olduğunu bildirib. Azərbaycanda sənaye parklarının yaradılması istiqamətində müvafiq tədbirlərin həyata keçirildiyini diqqətə çatdıran nazir bu sahədə Macarıstan şirkətlərini fəal əməkdaşlığa dəvət edib. Çıxışında həmçinin Azərbaycan iqtisadiyyatı barədə məlumat verən Ş.Mustafayev qeyd edib ki, Azərbaycan dinamik inkişaf edən ölkəyə çevrilib, sahibkarlıq fəaliyyəti genişlənib, əlverişli biznes və investisiya mühiti yaradılıb, ölkə investisiya ixracatçısına çevrilib.

Öz növbəsində HİTA-nın sədri Erjebet Doboş Macarıstan iqtisadiyyatına, Azpromo-nun prezidenti vəzifələrinin icraçısı Rüfət Məmmədov Azərbaycanın biznes və investisiya imkanlarına, Azərbaycan İnvestisiya Şirkətinin icraçı direktoru vəzifəsini icra edən Rövşən Nəcəf təmsil etdiyi qurumun fəaliyyəti və həyata keçirdiyi layihələrə dair təqdimatlarla çıxış ediblər. Azərbaycan Gənc Sahibkarlar Şəbəkəsinin İdarə Heyətinin sədri Xaliq İldırımzadə isə çıxışında ölkədə sahibkarlığın inkişafına göstərilən diqqət və qayğı nəticəsində gənclər arasında işgüzar fəallığın artdığını vurğulayıb, təmsil etdiyi qurumun fəaliyyəti barədə məlumat verib.

Tədbir çərçivəsində Macarıstanın «Hartong-Malt KFT» şirkəti ilə Azərbaycanın «Prestij-Naxçıvan Pivəsi» şirkəti arasında pivə istehsalı üçün xammal təchizatına dair müqavilə imzalanıb. Biznes-forum iş adamları arasında ikitərəfli görüşlərlə davam edib.

«Bu gün isə Macarıstan və Azərbaycan arasında iqtisadi əməkdaşlıq üzrə birgə komissiyanın III iclası keçiriləcək», - deyə nazirlikdən bildirilib.

Səfər çərçivəsində Azərbaycan nümayəndə heyəti bir sıra görüşlər keçirəcək, istehsal müəssisələrinin fəaliyyəti ilə tanış olacaq.