Sahibkarlıq

Ana səhifə

Sahibkarlıq

MUSİAD prezidenti: “İş adamına sabitlik, azadlıq və hüquq lazımdır” - MÜSAHİBƏ

MUSİAD prezidenti: “İş adamına sabitlik, azadlıq və hüquq lazımdır” - <font color=red>MÜSAHİBƏ</font>

12 oktyabr 2012 12:52 (UTC +04:00)

İstanbul. Əli Əhmədov - APA-Economics. Türkiyə Müstəqil Sənayeçi və İş Adamları Dərnəyinin (MUSİAD) prezidenti Nail Olpakın “APA-Economics”ə müsahibəsi

- Nail bəy, bu gün keçirilən tədbir İslam ölkələri arasında əlaqələrin güclənməsində ciddi rol oynayacaqmı?

- Budəfəki tədbirin əsas devizi “Öz biznesini İslam Dünyası ilə birləşdir” olsa da, tədbirdə təkcə İslam ölkələrindən yox, digər ölkələrdən də nümayəndələr qatılıb. Belə ki, İslam Əməkdaşlıq Təşkilatına üzv ölkələrin sayı 57 olsa da, tədbirə 86 ölkə qatılıb. Məsələn, Litva və Çexiya kimi İslam ölkəsi olmayan ölkələr var. Buna görə də biz bu tədbirə təkcə biznes yox, həm də mədəniyyətlərin qovuşması kimi baxırıq.

- Sizcə, indi İslam ölkələrinin bir-biri ilə iqtisadi əlaqələri kifayət qədərdimi?

- Fikrimcə, İslam ölkələri arasında ticarətin həcmi dəfələrlə arta bilər. Həm Türkiyə rəhbərliyi, həm də MUSİAD rəhbərliyi bildirib ki, İslam ölkələri arasında ticarət potensialı indi olduğundan dəfələrlə böyükdür. Hazırda İslam ölkələrinin öz aralarındakı ticarətin həcmi ümumi xarici ticarətin cəmi 17%-ni təşkil edir, halbuki bu rəqəm 70% olmalıdır. Məsələn, Avropa Birliyi ölkələrinin xarici ticarətində Avropa daxili əməliyyatların həcmi 60% təşkil edir. Eyni şəkildə İslam ölkələri də bu rəqəmlərə nail ola bilər.

- Bu məqsədə necə nal olmaq mümkündür?

- Bu məqsədə çatmaq üçün daha çox çalışmalı, belə tədbirləri artırmaq lazımdır. 86 ölkədən 5 min iş adamının bir yerə yığılması sahibkarlar üçün gözəl imkandır ki, onlar əməkdaşlığı müzakirə etsinlər. Hazırda müsəlman ölkələri arasında iqtisadi əməkdaşlığı koordinasiya etmək üçün beynəlxalq təşkilat var - İslam Əməkdaşlıq Təşkilatı. Amma onun daha geniş fəaliyyət göstərməsini arzulayırıq.

- MUSİAD təşkilatının Azərbaycanla əlaqələrini necə qiymətləndirirsiniz?

- Azərbaycanla əlaqələri artırmaq üçün daha çox qarşılıqlı səfərlər olmalıdır. Məsələn bu tədbirə bütün dünyadan olduğu kimi, Azərbaycandan da təşkilat və şirkətlər qatılıblar. Fikrimcə, əməkdaşlığı daha da gücləndirmək üçün bundan sonrakı addım MUSİAD-dakı sahəvi bölmələrlə Azərbaycanda həmin sahənin şirkətlərini bir araya gətirməkdir. Biz MUSİAD olaraq Azərbaycan Sahibkarlar Konfederasiyası ilə geniş əməkdaşlıq edirik. Bundan başqa, MUSİAD-ın Azərbaycanda təmsilçiliyi də var. Azərbaycanla əməkdaşlığı gücləndirməyi düşünürük.

- Son bir ildə müsəlman ölkələrində böyük dəyişikliklər başlanıb. Demokratik sahədə baş verən dəyişikliklər bu ölkələrdə biznesin inkişafına necə təsir edib?

- İş adamının iş görməsi üçün nə lazımdır – sabitlik, azadlıq və hüquq. Bunlar isə demokratiyanın əsasıdır. Yəni hansısa ölkədə bunlar varsa, iş daha yaxşı gedəcək. Əgər hansısa ölkədə bu sahələrdə problem varsa, onda bu ölkələrin biznes aləmi də yaxşı inkişaf etməyəcək və qapalı bir sahəyə çevriləcək. Bu mənada demokratiyanın gəldiyi ölkələrdə ciddi dəyişikliklər baş verir.

- Siz bunu nəyə əsasən deyirsiniz? Məsələn, ötən ilki tədbirlərdə müqayisədə, Misir və ya Tunisdən gələnlərin sayı artıbmı?

- Əlbəttə, ötən ilki sərgimizə 3400 iş adamı qatılmışdı, bu il isə onların sayı 5000-ə qalxıb, yəni 50% artıb. Bu, biznesin inkişafını göstərən ən yaxşı sübutdur.