Sahibkarlıq

Ana səhifə

Sahibkarlıq

Zaqatalada «Rəqabətqabiliyyətli fındıq emalı məhsullarının istehsalının və ixracının təşviqi» mövzusunda tədbir keçirilib

15 oktyabr 2012 13:05 (UTC +04:00)

Bakı. Nicat Mustafayev – APA-Economics. Bu gün İqtisadi İnkişaf Nazirliyinin təşkilatçılığı ilə Zaqatalada «Rəqabətqabiliyyətli fındıq emalı məhsullarının istehsalının və ixracının təşviqi» mövzusunda tədbir keçirilib.

Nazirlikdən «APA-Economics»ə verilən məlumata görə, tədbirdə müvafiq dövlət qurumlarının, Şəki-Zaqatala regionu üzrə yerli icra hakimiyyəti orqanlarının nümayəndələri və fındıq istehsalı ilə məşğul olan sahibkarlar iştirak edib.

İqtisadi İnkişaf Nazirliyinin Sahibkarlığın inkişafı siyasəti şöbəsinin müdiri Zaur Qasımov ölkədə həyata keçirilən sosial-iqtisadi siyasət nəticəsində davamlı iqtisadi inkişafın təmin edildiyini vurğulayıb, özəl sektorun inkişafı, qabaqcıl texnologiyaların tətbiqinin genişləndirilməsi istiqamətində həyata keçirilən tədbirlər barədə məlumat verib. Z.Qasımov məqsədyönlü dövlət proqramlarının uğurlu icrası nəticəsində qeyri-neft sektorunun sürətlə inkişaf etdiyini, yeni iş yerlərinin və müasir müəssisələrin yaradıldığını, iqtisadiyyata investisiya qoyuluşunun artdığını, rəqabətqabiliyyətli məhsul istehsalının genişləndirildiyini diqqətə çatdırıb. Çıxışda fındıq istehsalının stimullaşdırılması, bu sahədə istehsal olunan məhsulların potensial bazarlara çıxarılmasında sahibkarlara dövlət dəstəyinin gücləndirilməsi, iş adamlarının təşəbbüslərinin dəstəklənməsi tədbirlərinin davam etdirildiyi vurğulanıb.

Azərbaycanda İxracın və İnvestisiyaların Təşviqi Fondunun (Azpromo), Almaniya Texniki Əməkdaşlıq Cəmiyyətinin (GIZ) nümayəndələri isə çıxışlarında Azərbaycanda özəl bölmənin inkişafına böyük diqqət və qayğı göstərildiyini qeyd edib, qeyri-neft məhsullarının xarici bazarlara çıxarılması istiqamətində həyata keçirilən tədbirlər barədə məlumat veriblər.

Tədbirdə həmçinin Almaniyanın «Schlüter&Maack» şirkətinin nümayəndələri tərəfindən təqdimatlar keçirilib, xarici bazarlara, o cümlədən Avropa bazarlarına daxil olmaq üçün əsas tələblər, keyfiyyət standartlarının tətbiqi, fındıq emalı məhsullarının rəqabət qabiliyyətinin daha da artırılması istiqamətində ixracatçılara tövsiyələr verilib.

Qeyd edək ki, «Schlüter&Maack» şirkəti Azərbaycandan fındıq, qoz, şabalıd, qurudulmuş meyvələr kimi məhsulların alınmasında maraqlıdır.