Sahibkarlıq

Ana səhifə

Sahibkarlıq

Göyçayda Nar Bayramı keçirilir

03 noyabr 2012 12:34 (UTC +04:00)

Göyçay. Elvin Yaqubov - APA. Bu gün Azərbaycanın Göyçay rayonunda VII Nar Bayramının açılış mərasimi keçirilib. APA-nın məlumatına görə, hazırda bayram tədbirində Milli Məclisin 20-ə yaxın deputatı, 15-ə yaxın ölkənin Azərbaycandakı səfiri, beynəlxalq təşkilatların nümayəndələri, ictimai birliklərin nümayəndələri, tanınmış elm və sənət adamları, ətraf rayonların icra hakimiyyətlərinin başçıları, yerli və əcnəbi iş adamları, ölkədə təhsil alan əcnəbi tələbələr, eləcə də yerli və xarici KİV nümayəndələri iştirak edirlər.

Tədbirin açılış mərasimində Göyçay rayonu İcra Hakimiyyətinin başçısı Mənsur Məmmədov, BMT-nin Azərbaycandakı rezident əlaqələndiricisi Antonius Broek, Milli Məclisin aqrar məsələlər komitəsinin sədri Eldar İbrahimov, elm və təhsil komitəsinin sədri Şəmsəddin Hacıyev çıxış ediblər. Bildirilib ki, 2006-cı ilin noyabrından başlayaraq ənənəvi olaraq 7-ci dəfə keçirilən Nar Bayramı rayonda narçılığın inkişafına, məhsul istehsalının artımına və onun satış şəbəkəsinin genişlənməsinə səbəb olub. Bir çox rayonlarda məhsul bayramlarının, o cümlədən Göyçayda ənənəvi olaraq hər il nar bayramının keçirilməsində əsas məqsəd regionların təbliği, mədəni, sosial-iqtisadi potensialın nümayişi və turizmin inkişaf etdirilməsidir.

Mərasimdə qeyd olunub ki, nar bir meyvə olmaqla yanaşı həm də, cəmiyyədə böyük mədəni hadisəyə çevrilib. Müxtəlif ölkələrdə meyvə-tərəvəz məhsulları ilə bağlı festivalların keçirildiyini qeyd edən natiqlər Azərbaycanda narın şəninə beynəlxalq səviyyədə tədbirin keçirilməsini tədqirəlayiq hesab ediblər. Vurğulanıb ki, erməni millətçiləri nar meyvəsindən təbliğat kimi istifadə edərək ölkələrini bu yolla tanıtmağa çalışırlar. Ermənilərin bu yalanına haqlı cavab olaraq builki Nar Bayramının daha çox xarici qonağın iştirakı ilə keçirilməsi mümkün olub və orada təşkil edilən nar və nar məhsullarının sərgisi vasitəsilə dünyanın ən dadlı nar sortlarının məhz Göyçayda yetişdiyi sübut edilib. Məlumat verilib ki, hazırda rayonda 67 sort nar yetişdirilir. Narın şirəsindən və qabığından 20-dək xəstəliyin müalicəsində istifadə olunduğu bildirilib. Son 5 ildə Göyçayda nar bağlarının ümumi sahəsi 3 dəfə artırılaraq 3 420 hektara çatdırılıb.

Çıxışlardan sonra festivalda nara həsr olunan şeir və mahnılar səsləndirilib. Qonaqlar nar sərgisində rayonun 32 kəndində narçılıqla məşğul olanların yetişdirdiyi müxtəlif sort nardan hazırlanan məhsulların dadına baxıb, yerli müəssisələrdə istehsal edilən şirələrin keyfiyyəti ilə maraqlanıblar. İdmançıların, sehrbaz və kəndirbazların, mahnı-rəqs qruplarının çıxışları olub, müxtəlif mədəni-əyləncəli proqramlar təşkil olunub. Tədbir iştirakçılarına bayram münasibətilə hazırlanan milli xörəklər, şirniyyatlar da təqdim olunub. Tədbirdə ilk dəfə olaraq İtaliyanın milli yeməyi sayılan pizza müsabiqəsi keçirilib. Bakının tanınmış mütəxəssisləri tərəfindən xüsusi hazırlanan nar reseptindən pizzalar qonaqlara təqdim olunub. İtaliyanın «Patisseri» şirniyyat şəbəkəsinin sahibi Cianni de Karlonun xüsusi olaraq nar bayramı üçün hazırladığı nar şirəsi qatılmış piroq və tortlar da hamının marağına səbəb olub.

Sonra folklor qruplarının çıxışları olub, məktəblilərin əl işlərindən ibarət sərgiyə baxış keçirilib. Tədbirdə qonaqlar əl ilə yüksək ustalıqla hazırlanmış nar şirəsinin, nar şərabının, nardançanın, gilələnmiş narın dadına baxıblar. Nar məhsullarının istehsalı ilə məşğul olan müəssisələrin məhsullarından ibarət yarmarka, müxtəlif sort nardan hazırlanan məhsulların sərgisi, eləcə də nar ilə bağlı müsabiqələr, oyunlar təşkil edilib.

Bayram tədbiri axşam saatlarında Azərbaycan və Türkiyənin tanınmış incəsənət ustalarının iştirak etdiyi konsert proqramı ilə davam edəcək. Konsert atəşfəşanlıqla başa çatacaq.