Bakı. Nicat Mustafayev – APA-Economics. Braziliya Xarici İşlər Nazirliyinin əməkdaşlıq, mədəniyyət və ticarətin təbliği üzrə baş katibinin müavini Hadil da Roşa Viannanın rəhbərlik etdiyi nümayəndə heyətinin Azərbaycana səfəri çərçivəsində Azərbaycanda İxracın və İnvestisiyaların Təşviqi Fondunda (Azpromo) işgüzar görüş keçirilib.
Azərbaycan İqtisadi İnkişaf Nazirliyindən «APA-Economics»ə verilən məlumata görə, tədbirdə Azərbaycanın iqtisadi inkişaf nazirinin müavini Niyazi Səfərov ölkənin qazandığı iqtisadi uğurlar, əlverişli biznes və investisiya mühiti, ölkənin iştirakçısı olduğu irimiqyaslı regional layihələr haqqında məlumat verib. Azərbaycan və Braziliya arasında əməkdaşlığın uğurla inkişaf etdiyini qeyd edən nazir müavini iki ölkə arasında əlaqələrin qarşılıqlı dostluq və tərəfdaşlıq prinsipləri üzərində qurulduğunu, qarşılıqlı səfərlərin ikitərəfli əlaqələrin inkişafında mühüm əhəmiyyətini vurğulayıb.
Öz növbəsində Hadil da Roşa Vianna dostluq zəminində qurulan Azərbaycan-Braziliya münasibətlərinin inkişaf etdiyini qeyd edib, qarşılıqlı faydalı əməkdaşlığın bundan sonra da genişlənəcəyinə əminliyini bildirib. Hadil da Roşa Vianna Braziliya və Azərbaycan arasında iqtisadi əlaqələrin genişləndirilməsi üçün hər iki ölkənin böyük potensiala malik olduğunu da qeyd edib.
İşgüzar görüşdə Azpromo-nun rəhbəri Rüfət Məmmədov qurumun fəaliyyəti barədə məlumat verib və Azpromo tərəfindən braziliyalı iş adamlarına ölkəmizdə biznes fəaliyyətinin təşkili sahəsində müvafiq dəstəyin göstəriləcəyini bildirib.
Tədbirdə həmçinin, infrastruktur, qida sənayesi və aviasiya sahəsində fəaliyyət göstərən Braziliya şirkətlərinin nümayəndələri təqdimatlarla çıxış edib, Azərbaycanın investisiya imkanlarına dair müzakirələr aparılıb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
