Sənaye və energetika

Ana səhifə

«SOCAR&Turcas/İnjas» şirkətlər alyansı Türkiyənin «Petkim» şirkətinə 15 mlrd. ABŞ dolları sərmayə yatıracaq

02 iyun 2009 14:30 (UTC +04:00)

Bakı. Rəşad Süleymanov - APA-Economics. «SOCAR&Turcas/İnjas» şirkətlər alyansı 2018-ci ilədək Türkiyənin «Petkim» neft-kimya kompleksinə 15 mlrd. ABŞ dolları sərmayə yatırmaqla müəssisənin illik istehsal gücünü hazırkı 3 mln. tondan 6 mln. tona çatdırmaq niyyətindədir. «APA-Economics»in məlumatına görə, bunu «Petkim» şirkətinin icraçı direktoru Kənan Yavuz bildirib. K. Yavuzun sözlərinə görə, bu investisiyalar hesabına «Petkim» kompleksinin daxilində yeni neft emalı zavodlarının inşası həyata keçiriləcək. Artıq bununla bağlı işlərə başlanılıb: «Bu neft emalı zavodları Ceyhanda inşa ediləcək zavoddan 2 mln. dollar ucuz başa gələcək. Buna səbəb liman, baraj və elektrik şəbəkəsinin mövcudluğudur».

K. Yavuz zavodlar istifadəyə veriləndən sonra «Petkim»in illik istehsal gücünün minimum 10 mln. ton təşkil edəcəyini bildirib. Xammal kimi isə Azərbaycan və digər ölkələrdən alınan neftdən istifadə olunacaq.

Hazırda «Petkim»in illik xammal təlabatı 2 mln. ton neft təşkil edir.

«Yeni zavodlar Türkiyədə ehtiyac duyulan təyyarə benzini ilə yanaşı, digər məhsullar da istehsal edəcək» - deyən K. Yavuz dünyadakı böhranın “Petkim”in fəaliyyətinə təsir göstərmədiyini, müəssisənin əvvəlki qaydada çalışdığını qeyd edib.

Xatırladaq ki, hazırda «Petkim»in istehsal etdiyi neft-kimya məhsullarının 25%-i 68 ölkəyə ixrac olunur. Yeni neft emalı müəssisələri qurulandan sonra şirkət Türkiyənin ehtiyacının 40%-ni təmin edəcək.

K. Yavuz yeni zavodların inşası ilə yanaşı, «Petkim» limanının yaxın 5 il ərzində Türkiyənin ən böyük limanına çevirmək niyyətində olduqlarını da bəyan edib: «Limana ayrıca sərmayə yatırırıq. Ümumilikdə bu məqsədlə 150 mln. dollar investisiya nəzərdə tutulur. Yaxın 5 ilə «Petkim» limanı Türkiyənin ən böyük konteyner limanı olacaq».

Qeyd edək ki, «Petkim»in 51%-lik səhm paketinin satışı ilə bağlı tender 2007-ci ilin iyul ayında keçirilib və 2,05 mlrd. dollar təklif edən «TransCentralAsia Petrochemical Holding» Qazaxıstan-Rusiya birgə müəssisəsi tenderin qalibi elan olub. Lakin daha sonra tender komissiyası bu qərarı ləğv edərək, «SOCAR-Turcas-İnjaz» alyansını tenderin qalibi elan edib. ARDNŞ 2008-ci ildə «Petkim»ə 47 mln. ABŞ dolları məbləğində sərmayə yatırdığın bəyan edib.