Sənaye və energetika

Ana səhifə

Bu il dünya neft sənayesinə investisiya qoyuluşu rekord həddə çatacaq

03 iyun 2009 09:22 (UTC +04:00)

Bakı. Vahab Rzayev - APA-Economics. Cari ildə dünyada neft sənayesinə qoyulan investisiyalar üzrə yeni rekord qeydə alınacaq. “APA-Economics”in məlumatına görə, bu barədə “Ernst&Young” beynəlxalq audit və konsaltinq şirkətin məruzəsində bildirilir.
Məruzədə qeyd olunur ki, dünyada neftə tələbatın azalmasına baxmayaraq, neft şirkətləri öz layihələrinin maliyyələşməsini artıracaq ki, iqtisadi artım bərpa olunanda bundan fayda götürsünlər. Ekspertlərin hesablamalarına görə, 2009-cu ildə neft sənayesinə investisiyaların həcmi 375 mlrd. dollar təşkil edəcək.
Məruzənin müəlliflərindən biri olan “Ernst & Young” şirkətinin rəsmisi Endi Broqanın sözlərinə görə, ötən il də milli və transmilli neft şirkətləri rekord həcmdə investisiya yatırıb, lakin cari ildə bu rekordun yenilənəcəyi gözlənilir. Beləliklə, dünyanın iri neft şirkətlərin sırasında “Chevron” investisiyaları artıracaq, “ExxonMobil” və “Total” ötənilki həcmi saxlayacaq, “Shell”, “BP” və “ConocoPhillips” şirkətləri isə investisiyalarını azaldacaq. Dünya miqyasında investisiyaların artımı əsasən inkişafda olan ölkələrin şirkətlərinin hesabına baş verəcək. Belə ki, Asiya ölkələrinin neft şirkətlərinin investisiyaları dünya göstəricisinin 36%-ni təşkil edəcək. İnvestisiyanın 33%-i isə Cənubi Amerika şirkətlərin payına düşəcək. Afrika, MDB və Yaxın Şərqin neft şirkətləri Asiya və Cənubi Amerika şirkətlərdən miqyas və həcm üzrə geri qalsalar da, onlar üzrə artım gözlənilir.