Sənaye və energetika

Ana səhifə

«Neft Daşları»nda 2 saylı sıxıcı-kompressor stansiyasının istehsal gücü 50% artırılıb

12 iyun 2009 13:12 (UTC +04:00)

Bakı. Rəşad Süleymanov – APA-Economics. ARDNŞ-in «Neftqaztikinti» tresti və Xəzər Dəniz Neft Donanması açıq dəniz şəraitində əvvəlcədən hazırlanmış 20 düyümlük qaz kəməri «Neft Daşları»na apararaq sərbəst dalma üsulu ilə dənizin dibinə salmağa nail olub. Bu barədə «APA-Economics»ə ARDNŞ-dan məlumat verilib.

Kəmər «Neftqaztikinti» trestinin 3 nömrəli tikinti-quraşdırma idarəsi tərəfindən Hövsandakı inşaat sahəsində qaynaq edilib. Rekord müddətə - 1,5 aya inşa edilən kəmər dənizə nəql edilmək üçün pontonlarla təchiz edilib. Kəmər dənizlə «Lyutoqa» və «Mikayıl Əliyev» yedək gəmiləri vasitəsi ilə nəql olunub. Boru kəmərini gəmilərlə böyük dalğıclar qrupu müşayiət edərək, pontonların vəziyyətini nəzarətdə saxlayıb. Nəql əməliyyatı 14 saat davam edib.

Mənzil başına çatdıqdan sonra kəmərin bir ucu 2 saylı sıxıcı-kompressor stansiyasına (SKS) birləşdirilib, digər ucu isə qaz separatorları sahəsinə qaldırılıb. Burada o sahilə gedən Neft Daşları-Bahar-Qaradağ magistral qaz kəmərinə birləşdiriləcək.

Qeyd edək ki, əlavə qaz kəmərinə tələbatın yaranması «Neft Daşları»ndakı 2 saylı SKS-in 3 qaz-turbin aqreqatı sayəsində genişləndirilməsi ilə bağlıdır. Genişlənmədən sonra stansiyanın istehsal gücü sutkalıq 7,4 mln. kubmetrdən 11 mln. kubmetrə çatdırılacaq.

Qaz proqramı çərçivəsində bu il ARDNŞ «Günəşli» və «Neft Daşları» yataqlarında ümumi uzunluğu 15-20 km olan 8-9 platformalararası mədən boru kəmərlərinin inşasını planlaşdırır.