Sənaye və energetika

Ana səhifə

«Neft Daşları» ilə Dübəndi terminalı arasında çəkiləcək neft kəmərinin keçəcəyi sualtı yol tədqiq edilib

19 iyun 2009 11:26 (UTC +04:00)

Bakı. Nicat Mustafayev – APA-Economics. Azərbaycan Respublikası Dövlət Neft Şirkətinin (ARDNŞ) Kompleks Geoloji-Kəşfiyyat və Topoqrafiya İdarəsinin mütəxəssisləri «Geofizik-2» elmi-tədqiqat gəmisi vasitəsilə «Neft Daşları» ilə Dübəndi terminalı arasında çəkiləcək daha bir neft kəmərinin keçəcəyi sualtı yolu tədqiq ediblər.

ARDNŞ-dan «APA-Economics»ə verilən məlumata görə, «28 May» və «Neft Daşları» NQÇİ-ləri tərəfindən hasil edilən neft həmin terminala nəql edilir. Ekspedisiya tərəfindən 1 091 km dəniz dibinin sonar fotoçəkilişi aparılıb, sualtı relyef tədqiq edilib və 438 poqon km-də batimetriya həyata keçirilib. Bununla yanaşı, 63 nöqtədən qrunt nümunələri götürülüb.

Qeyd edək ki, mütəxəssislərin ətraflı məlumatla təmin edilməsi məqsədilə bu il «Geofizik-2» gəmisi ARDNŞ tərəfindən xarici ölkələrdən alınmış müasir tədqiqat avadanlıqları ilə təchiz edilib. Araşdırmaların nəticələri gələcək neft kəmərinin layihə-smeta sənədlərinin hazırlanması üçün «Neftqazlayihə» institutuna təqdim edilib.