Sənaye və energetika

Ana səhifə

Nazir: Azərbaycanın qaz anbarlarında mavi yanacağın saxlanma qabiliyyəti 5 mlrd. kubmetrə çatdırılacaq

20 iyun 2009 12:01 (UTC +04:00)

Bakı. Nicat Mustafayev – APA-Economics. Azərbaycan təbii qaz anbarlarında mavi yanacağın saxlanma qabiliyyəti 5 mlrd. kubmetrə qədər artıracaq. «APA-Economics»in məlumatına görə, bunu Azərbaycanın sənaye və energetika naziri Natiq Əliyev bildirib.

Nazirin sözlərinə görə, əvvəllər Azərbaycanda qaz anbarlarının olmaması ölkənin mavi yanacaq təsərrüfatı sahəsində bir sıra çətinliklər yaradıb: “Bir neçə il bundan öncə qış ayları üçün Azərbaycanın qaz anbarlarında qazın saxlanma qabiliyyəti cəmi 500 mln. kubmetrə bərabər idi. Lakin sonradan bir sıra tədbirlər həyata keçirildi və qaz anbarlarında mavi yanacağın saxlanma həcmi 1,2 mlrd. kubmetrə çatdırıldı. Hesab edirəm ki, bu da azdır”.

N. Əliyev həmçinin qeyd edib ki, Azərbaycan Respublikası Dövlət Neft Şirkəti (ARDNŞ), «Azəriqaz» QSC, həmçinin Sənaye və Energetika Nazirliyi müvafiq tapşırıqlara əsasən qaz anbarlarının genişləndirilməsini həyata keçirir: «İlkin mərhələdə qaz anbarlarının saxlama qabiliyyəti 3 mlrd. kubmetrə, daha sonra isə 5 mlrd. kubmetrə çatdırılacaq. Bu da, qazın daha səmərəli istifadə edilməsinə, Gürcüstan, Türkiyə kimi ölkələrlə daha çevik alqı-satqı əməliyyatlarının həyata keçiriləmisinə imkan yaradacaq».

Nazirin sözlərinə görə, «Şahdəniz», «Azəri-Çıraq-Günəşli» yatağlarında qaz hasilatının azalması təqdirdə, həmçinin ARDNŞ tərəfindən keçirilən profilaktik təmir işləri görüldüyü halda genişləndiriləcək qaz anbarları bu müvəqqəti problemləri aradan qaldıracaq.