Sənaye və energetika

Ana səhifə

Azərbaycanın «Çıraq» platformasından ilk neft hasilatından 15 il keçir

08 noyabr 2012 08:04 (UTC +04:00)

«BP-Azerbaijan» şirkətindən «APA-Economics»ə verilən məlumata görə, Heydər Əliyevin 1997-ci ilin oktyabrın 27-də imzaladığı fərmana əsasən, AÇG yataqlarının birgə işlənməsi üçün ölkə tarixində ilk dəfə olaraq bağlanmış Hasilatının Pay Bölgüsü Sazişi (HPBS) çərçivəsində hasilatın başlanması 1997-ci il noyabrın 12-də rəsmi olaraq qeyd olunub.

«AÇG-nin operatoru olan «BP-Azerbaijan» şirkəti o vaxtdan bəri həmin yataqlarda 6 əlavə platforma, o cümlədən 4 hasilat platforması tikib və onları təhlükəsiz və etibarlı şəkildə istismar etməkdədir. Bu platformalardan indiyədək ümumilikdə 2,1 mlrd. bareldən artıq neft hasil edilib ki, bu da ilk növbədə Azərbaycan xalqının və AÇG tərəfdaşlarının, eləcə də regionun mənafeyinə xidmət edir», - deyə şirkətdən bildirilib.

«BP-Azerbaijan»dan həmçinin bildirilib ki, AÇG hasilatının ardınca Azərbaycanı birbaşa dünya bazarları ilə bağlayan Bakı-Tbilisi-Ceyhan (BTC) boru kəməri tikilib: «BTC Azərbaycan, Gürcüstan və Türkiyə ilə Qərb arasında iqtisadi və siyasi əlaqələrin möhkəmlənməsinə kömək etməklə bu ölkəyə və regiona əhəmiyyətli əlavə faydalar gətirməkdə davam edir. Bu günədək BTC vasitəsilə Azərbaycandan təqribən 1,552 mln. ton barel xam neft nəql edilib və bu neft 2 013 tankerə yüklənərək dünya bazarlarına göndərilib».

«Çıraq» platforması indiyədək 600 mln. bareldən artıq neft hasil edib ki, bu da AÇG-nin ümumi hasilatının təxminən 1/3-i qədərdir. «Çıraq» ilkin olaraq 7 illik istismar üçün planlaşdırılmışdı: «Peşəkar işçi heyətinin əla iş icrası və qətiyyəti sayəsində bu platforma hələ də AÇG layihəsinin yeni platformaları ilə yanaşı ən yüksək standartlara uyğun şəkildə istismardadır və gözlənilir ki, hələ uzun illər boyunca işləyəcək».

Qeyd edək ki, AÇG yataqlarının işlənməsi layihəsində BP (operator – 35,78%), Azərbaycan Dövlət Neft Şirkəti (11,65%), «Chevron» (11,27%), «Inpex» (10,96%), «Statoil» (8,56%), «ExxonMobil» (8%), TPAO (6,75%), «Itochu» (4,3%) və «Hess» (2,72%) şirkətləri iştirak edir.