Böyük Britaniyanın Azərbaycanda qızıl, gümüş və mis hasil edən şirkəti “Anglo Asian Mining PLC” şirkəti 2024-cü ilin ilk rübü üzrə göstəricilərini açıqlayıb.
"APA-Economics" xəbər verir ki, şirkət 2024-cü ilin ilk rübündə 2,548 qızıl unsiya ekvivalentində (GEOs) qiymətli metal hasil edib. Bu da ötən ilin eyni dövrünə nisbətən 76,7% azdır. 2023-cü ilin ilk rübündə bu rəqəm 10,969 unsiya təşkil edib.
"Anglo Asian" bu ilin birinci rübündə 2,252 unsiya qızıl hasil edib ki, bu da ötən ilin eyni dövrünə nisbətən 3 dəfəyə yaxın azdır (2023-cü ilin I rübündə 6,741 unsiya qızıl).
Şirkətin mis hasilatı son bir ildə 847 tondan 54 tona düşüb. Gümüş hasilatı isə 2023-cü ilin ilk rübündəki 22,566 unsiyadan bu ilin birinci rübündə 6,410 unsiyaya qədər azalıb.
“Anglo Asian Mining”in baş icraçı direktoru Rza Vəziri kəskin azalmanın səbəbini ikinci tullantı bəndinin tikintisinin dayandırılması ilə bağlı hökumətin qərarı ilə əlaqələndirib: "Biz tullantı anbarının divarının tikintisi üçün hökumətin icazəsini gözləyirik. Bu normal hasilat səviyyəsini bərpa etmək üçün zəruri addımdır. Biz icazənin tezliklə veriləcəyini gözləyirik və bu, bütün maraqlı tərəflərimizin xeyrinə mövcud güclü metal qiymətlərindən yararlanmağa imkan verəcək”.
Xatırladaq ki, “Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. Müqavilədə Azərbaycanın payı 51%, “Anglo-Asian Mining Plc.” şirkətinin payı 49% təşkil edir.
Şirkətin adı son dövrlər Söyüdlü kəndində “Gədəbəy” yatağından qızıl hasilatı və emalı müəssisəsinin çirkab suları üçün ikinci süni gölün yaradılmasına etirazlarla bağlı hallanmışdı. Prezident İlham Əliyev iyulun 11-də 2023-cü ilin altı ayının sosial-iqtisadi yekunlarına həsr olunmuş müşavirədə bununla bağlı baş verənləri “qəbuledilməz” adlandırmışdı. Ekologiya və Təbii Sərvətlər Nazirliyini tənqid edib və bildirmişdi ki, ikinci tullantı gölünün qurulması ciddi araşdırılmalıdır.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
