Ötən il SOCAR-ın karbamid zavodunun gəlirləri 225 mln. manatı ötüb, bu da illik müqayisədə 6,4 dəfə çoxdur.
SOCAR-dan “APA-Economics”ə verilən məlumata görə, bu barədə zavodun direktoru Xəyal Cəfərov bildirib.
Onun sözlərinə görə, 2020-ci ildə zavodun gəlirləri təqribən 35 mln. manat təşkil edib.
X. Cəfərov bildirib ki, ötən il zavod tərəfindən 355 min ton karbamid istehsal edilib, bu da illik ifadədə təxminən 3 dəfə çoxdur. Belə ki, 2020-ci ildə bu göstərici 120 min tona yaxın olub.
Zavodun direktoru əlavə edib ki, 2021-ci ildə müəssisə 323 min tondan çox məhsul ixrac edib, bu da 4,6 dəfə çoxdur. 2020-ci ildə zavod 70 min tona yaxın karbamid ixrac edib.
"Bunlara, dediyim kimi, istehsalın artımı, ondan başqa da, karbamidə olan dünya bazarlarında həm tələbat, həm də qiymətlərin kəskin artması səbəb olub", - X. Cəfərov bildirib.
Onun sözlərinə görə, əgər 2020-ci ildə Qara dəniz bazarında karbamidin bir tonunun qiyməti təqribən 220-230 dollar idisə, 2021-ci ilin IV rübündə bu göstərici 750-850 dollardan artıq idi.
X. Cəfərov onu da xatırladıb ki, zavod 2019-cu ildən fəaliyyətə başlayıb və hazırda tam gücü ilə işləyir.
Xatırladaq ki, Sumqayıtda inşa edilən karbamid zavodu 16 yanvar 2019-cu il tarixində istifadəyə verilib. Zavod ildə 650-660 min ton karbamid istehsal etmək qabiliyyətindədir. İstehsal həcminin təqribən 70%-i ixrac üçün nəzərdə tutulub ki, bu da ölkəyə illik 160 mln. dollara qədər həcmdə əlavə gəlirin daxil olmasına imkan verəcək. Karbamid zavodunun ümumi dəyəri təqribən 800 mln. avro təşkil edir.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
