Bu ilin I yarısında Cənubi Qafqaz Boru Kəməri (CQBK) və onun genişləndirilmiş hissəsi (genişləndirilmiş boru kəməri – CQBKG) üzrə əməliyyat xərcləri 27 mln. ABŞ dolları olub. Bu göstərici 2020-ci ilin müvafiq dövrü ilə müqayisədə 22,7% artıb.
"APA-Economics"in BP-nin (layihənin operatoru) Azərbaycanda apardığı əməliyyatlar üzrə 2021-ci ilin I yarısının yekunlarına dair dərc etdiyi hesabata istinadən verdiyi məlumata görə, hesabat dövründə CQBK və CQBKG üzrə əsaslı xərcləri təqribən 11 mln. dollar olub ki, bu da 2020-ci ilin müvafiq dövrü iləə müqayisədə 2,2 dəfə çoxdur.
CQBK boru kəməri 2006-cı ilin sonlarında istismara verilib və Azərbaycan, Gürcüstan və Türkiyəyə "Şahdəniz" qazını çatdırır, CQBKG (Cənub Qaz Dəhlizi çərçivəsində) isə kommersiya qaz həcmlərinin Türkiyəyə çatdırılmasına 2018-ci ilin iyun ayında, Avropaya isə 2020-ci ilin dekabr ayında başlayıb.
Hesabata əsasən, cari ilin I yarısında CQBK-nin gündəlik orta ötürücülük gücü 46,51 mln. kubmetr olub ki, bu da illik müqayisədə 41,7% çoxdur.
CQBK-nin iki operatoru var - BP şirkəti CQBK obyektlərinin tikintisi və istismarı üzrə məsul texniki operator, "SOCAR Midstream Operations" isə boru kəmərinin kommersiya əməliyyatları üzrə məsul kommersiya operatorudur.
Cənubi Qafqaz Boru Kəməri şirkətinin sərmayədarları bunlardır: BP (28,8%), TPAO (19%), AzSCP (10%), "SGC Midstream" (6,7%), "Petronas" (15,5%), "Lukoil" (10%), "Niko" (10%).
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
