Bu gün həyəcanlı gündür. Biz Anlaşma Memorandumu imzalayaraq siyasi siqnal göndəririk ki, Azərbaycanla tərəfdaşlıq edərək təbii qazın Avropaya idxalı üçün yeni dəhlizin yaradılmasına hazırıq.
APA-nın Bolqarıstana ezam olunmuş müxbiri xəbər verir ki, bunu Slovakiyanın iqtisadiyyat naziri Karel Hirman Bolqarıstanın “Bulgartransgas”, Rumıniyanın “Transgas”, Macarıstanın FGSZ, Slovakiyanın “Eustream” və Azərbaycan Dövlət Neft Şirkəti (SOCAR) arasında əməkdaşlığın inkişafına dair anlaşma memorandumunun Sofiya şəhərində keçirilən imzalanma mərasimində deyib.
O bildirib ki, keçən il Avropanın enerji sektoru üçün çətin il oldu.
“Qaz təchizatının təhlükəsizliyi sahəsində çətinliklərlə üzləşdik, eyni zamanda, qiymətlərdə ciddi artıma şahid olduq. Xüsusilə də Rusiya qazından asılı olan Mərkəzi və Şərqi Avropa ciddi çətinliklər yaşadı. Slovakiya ötürücü sistem operatorlarının qurulması ilə bağlı təşəbbüskarlardan olub, biz həmçinin Azərbaycandan əlavə təchizat üçün müvafiq strukturun inkişafını dəstəkləmişik. Rusiya qazından asılılığı tamamilə aradan qaldırmaq bizim milli gündəliyimizdədir, həmçinin Avropa Komissiyasının bloka üzv ölkələrin daha dayanıqlı olması istiqamətindəki fəaliyyəti ilə uzlaşır. Mən Azərbaycan qazının, SOCAR-la əməkdaşlıq çərçivəsində Şərqi Avropaya çatması üçün yeni ötürücü sistem operatorlarının qurulması ilə yeni dəhlizin yaradılması təşəbbüsünü dəstəkləyirəm. Bu təşəbbüsün bizim regionumuzda qaz təchizatının təhlükəsizliyi üçün böyük potensialı var. Biz artıq Anlaşma Memorandumu imzalayaraq prosesi başlatmış olduq. Biz bu istiqamətdə səyləri həm siyasi, həm də maliyyə baxımından dəstəkləyirik. Biz qaz bazarında Azərbaycanla əməkdaşlığımızda yeni səhifə açırıq. Çünki Azərbaycan və SOCAR bizim üçün uzunmüddətli, etibarlı və ədalətli tərəfdaşdır. Mən inanıram ki, növbəti on illikdə biz Azərbaycanla bu sahədə uğurlu əməkdaşlıq edəcəyik”, - nazir vurğulayıb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
