Sənaye və energetika

Ana səhifə

Bu il “Azəriqaz” “ASAN Xidmət” vasitəsilə 56 500-ə yaxın istehlakçıya xidmət edib

10 aprel 2018 08:21 (UTC +04:00)

Bu il “Azəriqaz” İstehsalat Birliyi “ASAN Xidmət” vasitəsi ilə 56 465 istehlakçıya xidmət edib.

“Azəriqaz”dan “APA-Economics”ə verilən məlumata görə, birlik tərəfindən bu ilin birinci rübündə Azərbaycan ərazisində fəaliyyət göstərən “ASAN Xidmət” və “ASAN Kommunal” mərkəzlərində istehlakçılardan daxil olan müraciətlər əsasında smart tipli sayğaclar ilə təchiz olunmuş istehlakçılara müvafiq xidmətlərin göstərilməsini, müraciətlərdən asılı olaraq şöbələrdən tələb olunan məlumatların əldə olunmasını və bu məlumatlar əsasında istehlakçılara xidmətlərin göstərilməsini təmin edib.

Yanvar-mart ayları ərzində Bakı şəhəri üzrə 1 və 2 saylı “ASAN Kommunal”, 4, 5 saylı “ASAN Xidmət” mərkəzlərinə və “ASAN səyyar” xidmətinə, bundan əlavə Bərdə, Sabirabad, Masallı, Qəbələ, Quba, Mingəçevir, həmçinin Gəncə şəhərində yerləşən “ASAN xidmət” mərkəzlərinə ümumilikdə 56 465 müraciət daxil olub və bu müraciətlərin icrası tam təmin olunub.

İstehlakçılarla münasibətlərin təkmilləşdirilməsi, göstərilən xidmətlərin keyfiyyətinin yüksəldilməsi məqsədilə birlik bu istiqamətdə fəaliyyətini bundan sonra da davam etdirəcək.