Sənaye və energetika

Ana səhifə

SOCAR Karbamid Zavodu layihəsinin idarə olunması Finlandiya şirkətinə həvalə olunub

18 may 2015 11:54 (UTC +04:00)

Bakı. Aqşin Rafiqoğlu - APA-Economics. Finlandiyanın paytaxtı Helsinkidə Azərbaycan Dövlət Neft Şirkəti (SOCAR) ilə bu ölkənin “Neste Jacobs Oy” şirkəti arasında Karbamid Zavodu Layihəsi üzrə Layihənin İdarəedilməsi və Müstəqil Təftiş Xidmətlərinə dair müqavilə imzalanıb.

SOCAR-dan “APA-Economics”ə verilən məlumata görə, imzalanma mərasimində bildirilib ki, gübrə sektorunda layihənin idarə edilməsi üzrə məsləhətçi kimi böyük təcrübəyə malik olan, yüksək keyfiyyətli texnologiyanın inkişafı, sənaye investisiya layihələri, texniki xidmət və performans təkmilləşdirmələri üzrə ixtisaslaşmış “Neste Jacobs Oy” layihənin idarəedilməsi üzrə məsləhətçi qismində çıxış edəcək, layihənin idarəedilməsi üzrə yüksək rəqabət qabiliyyətli xidmətlər göstərəcək, eyni zamanda zavodun tikintisi ilə bağlı müstəqil təftişləri əlaqələndirəcək.

Qeyd olunub ki, beynəlxalq təcrübəyə uyğun olaraq Layihənin İdarəedilməsi üzrə Təcrübəli Məsləhətçinin işə cəlb olunması layihələndirmə, xüsusilə, əsaslı layihələndirmə, alınmış material və avadanlıqların quraşdırılması, eləcə də istismar sınaqları mərhələlərində SOCAR-ın idarəetmə və nəzarət prosesinə dəstək olacaq. Bu məqsədlə 2014-cü ilin ortalarında beynəlxalq açıq tender elan edilib və “Neste Jacobs Oy” şirkəti tenderin qalibi olub. “Neste Jacobs Oy” və onun təşkil edəcəyi komanda SOCAR-ın adından MST müqaviləsi üzrə podratçıya nəzarət edəcək.

Azot gübrəsi-Karbamid istehsalı zavodunun layihəsi Azərbaycan prezidentinin müvafiq sərəncamı ilə təsdiq edilmiş “2008-2015-ci illərdə Azərbaycanda əhalinin ərzaq məhsulları ilə etibarlı təminatına dair Dövlət Proqramı”na uyğun olaraq, 13 mart 2013-cü il tarixində ARDNŞ və Cənubi Koreyanın Samsung Engineering Co., Ltd. şirkəti arasında imzalanıb Mühəndislik, Satınalma və Tikinti üzrə Müqaviləyə əsasən həyata keçirilir. Daxili tələbatın tam ödənilməsi ilə yanaşı, gələcəkdə istehsal olunan karbamid məhsulunun müəyyən hissəsi Türkiyəyə və SOCAR-a məxsus Kulevi Terminalı vasitəsilə dünya bazarlarına ixrac ediləcək. Zavodun 2017-ci ildə tam istismara verilməsi nəzərdə tutulub. Zavod ammonyak, maye və dənəvər karbamid istehsalı bölmələrindən ibarət olacaq. Sutkada 2000 ton karbamid istehsal edən zavod kənd təsərrüfatının davamlı inkişafına böyük töhfə verəcək, işsizlik probleminin aradan qaldırılmasına müsbət təsir göstərəcək.